ការដាំបន្លែក្នុងផ្ទះសំណាញ់ជួយឱ្យកសិករទទួលបានប្រាក់ចំណូលខ្ពស់ និងចូលរួមចំណែកក្នុងការអភិវឌ្ឍវិស័យកសិកម្មប្រកបដោយនិរន្តរភាព

(ខេត្តក្រចេះ)៖ ក្នុងឱកាសអញ្ជើញទៅទស្សនកិច្ចចម្ការ បង្ហាញស្តីពីការអនុវត្តកសិកម្មល្អលើដំណាំបន្លែ នៅក្នុងកសិដ្ឋានរបស់ប្រជាពលរដ្ឋ ឃុំថ្មគ្រែ ស្រុកចិត្របុរី ខេត្តក្រចេះ ដែលបានដាំបន្លែក្នុងផ្ទះសំណាញ់ តាមបច្ចេកទេសកសិកម្ម នៅរសៀលថ្ងៃទី២០ ខែមីនា ឆ្នាំ២០២៥ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ បានលើកទឹកចិត្តដល់បងប្អូនប្រជាកសិករខិតខំក្នុងការដាំបន្លែបង្ការដើម្បីផ្គត់ផ្គង់ការប្រើប្រាស់ក្នុងស្រុក ជំរុញការនាំចេញនៅនឹងកន្លែង។ ជីវភាពរបស់កសិកររូបនេះមានភាពរីកចម្រើន មានការងារ និងមានចំណូលទៀងទាត់។

  ចម្ការបង្ហាញស្តីពីការអនុវត្តកសិកម្មល្អលើដំណាំបន្លែ របស់ប្រជាកសិករក្នុងឃុំថ្មគ្រែ បានបង្កើតឡើង កាលពីខែកក្កដា ឆ្នាំ២០២២ រៀបចំដោយនាយកដ្ឋានការពារដំណាំ អនាម័យ និងភូគាមអនាម័យ នៃអគ្គនាយកដ្ឋានកសិកម្ម ឧបត្តម្ភដោយ អង្គកាតស្បៀង និងកសិកម្មនៃសហប្រជាជាតិ FAO ។ 

ផ្ទះសំណាញ់ដាំបន្លែបានផ្តល់អត្ថប្រយោជន៍ជាច្រើនដល់កសិករ៖ ការពារដំណាំពីសត្វល្អិត និងអាកាសធាតុមិនល្អ , ធ្វើឱ្យកសិករអាចគ្រប់គ្រងបរិស្ថានបានល្អ ដែលជួយបង្កើនទិន្នផលដំណាំ, ប្រេីប្រាស់ប្រព័ន្ធស្រោចស្រពបែបដំណក់ទឹក ជួយកាត់បន្ថយការប្រើប្រាស់ទឹក និងសន្សំសំចៃពេលវេលា ។ បន្លែដែលដាំដុះក្នុងផ្ទះសំណាញ់មានគុណភាពល្អ និងអាចលក់បានតម្លៃខ្ពស់ ដែលជួយបង្កើនប្រាក់ចំណូលគ្រួសារ និងធានាបាននូវបន្លែដែលមានសុវត្ថិភាពសម្រាប់សុខភាពអ្នកបរិភោគ ៕