គណៈកម្មាធិការជាតិគ្រប់គ្រងគ្រោះមហន្តរាយកម្ពុជា ចាត់តាំងមន្ត្រីបច្ចេកទេស គ.ជ.គ.ម. ទៅកាន់ប្រទេសមីយ៉ាន់ម៉ាដោយឈរលើស្មារតីសាមគ្គីភាពជាមួយប្រជាជនមីយ៉ាន់ម៉ាក្នុងពេលវេលាដ៏លំបាកនេះ

តាមការអនុញ្ញាតដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជជាណាចក្រកម្ពុជានិងជាប្រធានអណៈកម្មាធិការជាតិគ្រប់គ្រងគ្រោះមហន្តរាយអោយឯកឧត្តមកិត្តិសង្កហបណ្ឌិត គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី១ និងឯកឧត្តមបណ្ឌិត ហង្ស សាមឿន អនុប្រធានទី២ នៃគណៈកម្មាធិការជាតិគ្រប់គ្រងគ្រោះមហន្តរាយ នាថ្ងៃទី៣១ខែមីនាឆ្នាំ២០២៥នេះចាត់តាំងមន្ត្រីបច្ចេកទេស គ.ជ.គ.ម.ដោយមានការគាំទ្រពីមជ្ឈមណ្ឌលអាហា(AHA Centre)ផងនោះ ព្រះរាជាណាចក្រកម្ពុជាបានចូលរួមចំណែកយ៉ាងស្មោះស័្មគ្របំផុតដើរតួនាទីជាសមាជិកក្រុមប៉ាន់ប្រមាណនិងឆ្លើយតបគ្រោះមហន្តរាយរបស់ សមាគមអាស៊ាន (ASEAN-ERAT)។

គណៈកម្មាធិការជាតិគ្រប់គ្រងគ្រោះមហន្តរាយបានសម្រេចបញ្ចូនមន្ដ្រីចំនួន២រូបរបស់កម្ពុជា ជាសមាជិកនៃក្រុមប៉ាន់ប្រមាណ និងឆ្លើយតបបន្ទាន់របស់អាស៊ាន ដែលមានសមត្ថភាពជួយលើការងារសម្របសម្រួល វាយតម្លៃរហ័ត និងភស្ដុកម្ម និងការងារផ្សេងៗទៀត។

មន្រ្តីទាំង២រូបដែលត្រូវបញ្ជូនទៅកាន់ប្រទេសមីយ៉ាន់ម៉ានោះ រួមមាន៖

*ទី១៖ លោក សេង សំបាន អនុប្រធាននាយកដ្ឋានបណ្តុះបណ្តាល និងផ្សព្វផ្សាយ *ទី២៖ វរសេនីយ៍ឯក ចោម ថារស់ នាយសេនាធិការរង បញ្ជាការដ្ឋានទ័ពពិសេស កងទ័ពជើងគោក។

គណៈកម្មាធិការជាតិគ្រប់គ្រងគ្រោះមហន្ដរាយ បានបញ្ជាក់អោយដឹងថាការចូលរួមបេសកកម្មនោះមានសមាជិកក្រុមប៉ាន់ប្រមាណ និងឆ្លើយតបបន្ទាន់របស់អាស៊ាន ដែលនឹងចូលរួម ក្នុងបេសកកម្មនេះ រួមមាន៖ ប្រទេសព្រុយណេ ចំនួន៣រូប, ឥណ្ឌូនេស៊ី ចំនួន២រូប, ឡាវ ចំនួន១រូប, ម៉ាឡេស៊ី ចំនួន៣រូប, ហ្វីលីពីន ចំនួន៣រូប, សីង្ហបូរី ចំនួន៣រូប, ថៃ ចំនួន១រូប និងវៀតណាម ចំនួន៣រូប សរុបចំនួន២១រូប។

មន្ត្រីដែលត្រូវបានបញ្ជូនទៅចូលរួមក្នុងបេសកកម្មខាងលើ នឹងការចូលរួមរបស់ពួកគេក្នុងបេសកកម្មនេះ បង្ហាញពីការប្តេជ្ញាចិត្ត របស់កម្ពុជាដោយឈរលើស្មារតីសាមគ្គីភាពជាមួយប្រជាជនមីយ៉ាន់ម៉ាក្នុងពេលវេលាដ៏លំបាកនេះ។

រំលេចថាគ្រោះរញ្ជួយដីកម្លាំង ៧.៧វ៉ិចទ័រ បានបង្កការបំផ្លិចបំផ្លាញ និងការបាត់បង់ជីវិតនៅប្រទេសមីយ៉ាន់ម៉ា ដោយមានរបាយការណ៍ថាមានអ្នកស្លាប់ជាង ១,៧០០នាក់ អ្នករងរបួសរាប់ពាន់នាក់ និងការខូចខាតហេដ្ឋា រចនាសម្ព័ន្ធ យ៉ាងធ្ងន់ធ្ងរ។ ការឆ្លើយតបបន្ទាន់របស់កម្ពុជាក្នុងការបញ្ជូនមន្ត្រីទៅចូលរួមក្នុងប្រតិបត្តិការមនុស បានបង្ហាញពីស្មារតីសហប្រតិបត្តិការ និងឯកភាពក្នុងតំបន់អាស៊ានក្នុងពេលមានគ្រោះមហន្តរាយ។

រាជរដ្ឋាភិបាលកម្ពុជា នៅតែប្តេជ្ញាចិត្តក្នុងការគាំទ្រសហគមន៍ដែលរងផលប៉ះពាល់ និងចូលរួមចំណែកក្នុងកិច្ចខិតខំប្រឹងប្រែងសង្គ្រោះ នៅប្រទេសមីយ៉ាន់ម៉ា៕