ការដាក់បញ្ចូលផលិតផល ដែលមានសក្តានុពលរបស់ផលិតផលខ្មែរ ជាសមាជិកភូមិមួយផលិតផលមួយ ដើម្បីងាយស្រួលផ្ដល់នូវការគាំទ្រផ្នែកបច្ចេកទេស ក៏ដូចជាស្វែងរកទីផ្សារជូនពួកគាត់។ នេះបើតាមប្រសាសន៍លើកឡើងរបស់ ឯកឧត្តម ផល សុជាតិ អគ្គលេខាធិការគណៈកម្មាធិការជាតិ ជំរុញចលនាភូមិមួយផលិតផលមួយ ថ្លែងក្នុងឪកាសចុះសួរសុខទុក្ខ និងពិនិត្យមើលការលក់ដូរ របស់ក្រុមអាជីវករ ដែលសមាជិកមួយផលិតផលមួយមកតាំងលក់ផលិតផលក្នុងស្រុករបស់ខ្លួន នៅតាមបណ្ដោយផ្លូវស៊ីសុវត្ថិ នាសួនច្បារនៃផ្លូវថ្មើរជើង ម្តុំមុមុខព្រះបរមរាជវាំង កាលពីល្ងាចថ្ងៃអាទិត្យទី១៦ ខែមិនា ឆ្នាំ២០២៥។ ពិធីនេះក៏មានការចូលរួមពី លោក ហ្កាហ្កាន់ ម៉ាលីក តារាភាពយន្តដ៏ល្បីរបស់ឥណ្ឌា ដែលធ្លាប់ដើរតួជាតួអង្គព្រះពុទ្ធក្នុងរឿងពុទ្ធប្រវត្តិ ផងដែរ។
ឯកឧត្តម បានឲ្យដឹងទៀតថា គណៈកម្មាធិការជាតិ ជំរុញចលនាភូមិមួយផលិតផលមួយ បានរៀបចំគោលនយោបាយ និងយុទ្ធសាស្ត្រដើម្បីជួយគាំទ្រដល់ផលិតករខ្មែរ ដែលប្រើប្រាស់វត្ថុធាតុដើមក្នុងស្រុក ដើម្បីជួយដល់កសិករ ក៏ដូចជាជួយរកទីផ្សារឲ្យផលិតករខ្មែរ និងជំរុញឲ្យប្រជាជនខ្មែរងាកមកគាំទ្រនិងប្រើប្រាស់ផលិតផលខ្មែរទាំងអស់គ្នា។ ជាពិសេស រាជរដ្ឋាភិបាលកម្ពុជា បានចេញអនុក្រឹតមួយ ដោយកំណត់យកថ្ងៃទី៩ ខែមេសា រៀងរាល់ឆ្នាំ ជាទិវាជាតិលើកកម្ពស់ការប្រើប្រាស់ផលិតផលខ្មែរ ហើយគណៈកម្មាធិការជាតិ ជុំរុញចលនាភូមិមួយផលិតផលមួយ បានរៀបចំទិវាជាតិនេះចំនួន៧លើករួចមកហើយ ។ ឆ្នាំ២០២៥នេះ ងនឹងរៀបចំធ្វើទិវាជាតិលើកកម្ពស់ការប្រើប្រាស់ផលិតផលខ្មែរលើកទី៨ នៅខេត្តកោះកុង ចាប់ពីថ្ងៃទី២ដល់ថ្ងៃទី៨ ខែមេសា ឆ្នាំ២០២៥ ដើម្បីជាសារដាស់តឿន ក៏ដូចជាក្រើនរំលឹកដល់ប្រជាពលរដ្ឋឲ្យចូលចូរួមគាំទ្រ និងប្រើប្រាស់ផលិតផលខ្មែរ ដើម្បីជាមោទនភាពជាតិ ដូចប្រសាសន៍ដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ថា បើយើងជាខ្មែរមិនគាំទ្រផលិតផលខ្មែរ តើឲ្យអ្នកណាគាំទ្រផលិតផលខ្មែរយើង។
សូមបញ្ជាក់ដែរថា គណៈកម្មាធិការជាតិ ជំរុញចលនាភូមិមួយផលិតផលមួយ ដោយមានកិច្ចសហការជាមួយ ក្រសួងស្ថាប័នពាក់ព័ន្ធទាំងអស់ នឹងបន្តបេសកកម្មរបស់ខ្លួន ក្នុងការចងក្រងបណ្ដុំអ្នកផលិត ក៏ដូចជា ដាក់បញ្ចូលផលិតផលសក្តានុពលនានារបស់ផលិតផលខ្មែរ ជាសមាជិកភូមិមួយផលិតផលមួយ ដើម្បីងាយស្រួលផ្ដល់នូវការគាំទ្រ ផ្នែកបច្ចេកទេសក៏ដូចជា ស្វែងរកទីផ្សារជូនពួកគាត់៕
