គណៈប្រតិភូក្រុមមេធាវីរាជរដ្ឋាភិបាលនិងក្រុមមេធាវីស្ម័គ្រចិត្តសម្តេចតេជោសែន គោរពវិញ្ញាណក្ខន្ធ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន

ក្នុងឱកាសចូលរួមរំលែកមរណទុកដ៍ក្រៀមក្រំជាមួយក្រុមគ្រួសារ សព ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន ដែលកំពុងតម្កល់ធ្វើបុណ្យ តាមប្រពៃណី នៅគេហដ្ឋាននោះ គណៈប្រតិភូក្រុមមេធាវីរាជ    រដ្ឋាភិបាលនិងក្រុមមេធាវីស្ម័គ្រចិត្តសម្តេចតេជោសែន ដឹកនាំដោយឯកឧត្តម គី តិច ទេសរដ្ឋមន្ត្រីទទួលបន្ទុកបេសកកម្មពិសេស បានអញ្ជើញគោរពវិញ្ញាក្ខន្ធ សពឯកឧត្តម អ្នកញ៉ាឧត្តមមេត្រី វិសិដ្ឋ ហ៊ុន សាន នៅរសៀលថ្ងៃទី៣១ ខែមីនា ឆ្នាំ២០២៥។

ក្នុងវេលាពោរពេញដោយសមានទុក្ខនេះ គណៈប្រតិភូ ក្រុមមេធាវីរាជរដ្ឋាភិបាល និងក្រុមមេធាវីស្ម័គ្រចិត្តសម្តេចតេជោសែនបានសម្តែងងក្តីរន្ធត់សោកសង្រេងចំពោះមរណភាពឯកឧត្តមអ្នកឧកញ៉ាឧត្តមមេត្រីវិសិដ្ឋហ៊ុន សាន រដ្ឋលេខាធិការ ក្រសួងសាធារណការ និងដឹកជញ្ជូន និងបានចាត់ទុកមរណភាពនេះមិនត្រឹមតែជាការបាត់បង់នូវ បងប្រុស ឪពុក ឪពុកក្មេក និងជីតា ជាទីគោរពស្រឡាញ់ ប្រកបដោយព្រហ្មវិហារធម៌សម្រាប់ ក្រុមគ្រួសារ ប៉ុណ្ណោះទេ ប៉ុន្តែគឺជាការបាត់បង់នូវឥស្សរជនដ៏ឆ្នើមមួយរូប របស់ជាតិ ដែលបានលះបង់កម្លាំងកាយចិត្ត និងប្រាជ្ញាស្មារតីពុះពារមិន ខ្លាចនឿយហត់ ប្រកបដោយឆន្ទៈមនសិការស្នេហាជាតិក្នុងការបម្រើជាតិសាសនាព្រះមហាក្សត្រ ពិសេស ឯកឧត្តម អ្នកឧកញ៉ា ឧត្តមមេត្រីវិសិដ្ឋ បានបំពេញភារកិច្ចយ៉ាងសកម្ម ក្នុងការលើកកម្ពស់វិស័យសាធារណការ និងដឹកជញ្ជូន រហូតសម្រេចបានសមិទ្ធផលដ៏ធំធេងជាច្រើនដែលជាការចូលរួមយ៉ាងសំខាន់ជាមួយរាជរដ្ឋាភិបាល ក្នុងការកសាង និង អភិវឌ្ឍប្រទេសជាតិឱ្យទទួលបាននូវការរីកចម្រើន គួរជាទីមោទនៈ ។

ក្នុងវេលាដ៏ក្រៀមក្រំបំផុតនេះដែរ គណៈប្រតិភូ ក្រុមមេធាវីរាជរដ្ឋាភិបាល និងក្រុមមេធាវីស្ម័គ្រចិត្ត សម្តេចតេជោសែន សូមចូលរួមរំលែកនូវ សេចក្តីទុក្ខព្រួយ ជាមួយ សម្តេច ឯកឧត្តម លោកជំទាវព្រមទាំងក្រុមគ្រួសារ និងសូមឧទ្ទិសបួងសួងដល់ដួងវិញ្ញាណក្ខន្ធ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន សូមបានចាប់បដិសន្ធិក្នុងសុគតិភពកុំបីឃ្លៀងឃ្លាតឡើយ ។