គណៈប្រតិភូព្រះតំណាងដ៏ខ្ពង់ខ្ពស់ ព្រះអង្គម្ចាស់ នរោត្តម ចក្រាវុធ យាង និងអញ្ជើញគោរពវិញាណក្ខន្ធសព ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន

គណៈប្រតិភូព្រះតំណាងដ៏ខ្ពង់ខ្ពស់ ព្រះអង្គម្ចាស់ នរោត្តម ចក្រាវុធ ព្រះប្រធានគណបក្សហ្វ៊ុនស៊ិនប៉ិច ដឹកនាំដោយ ព្រះអង្គម្ចាស់ក្សត្រី នរោត្តម រតនាទេវី បានយាង និងអញ្ជើញដាក់កម្រងផ្កាគោរពគោរពវិញាណក្ខន្ធសព ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន រដ្ឋលេខាធិការក្រសួងសាធារណការ និងដឹកជញ្ជូន ដែលបានទទួលមរណភាព ក្នុងជន្មាយុ ៧៨ឆ្នាំ ដោយរោគាពាធ។

ពិធីគោរពវិញាណក្ខន្ធ និងរំលែកមរណទុក្ខដ៏ក្រៀមក្រំបំផុតនេះ បានប្រព្រឹត្តទៅនៅរសៀលថ្ងៃទី២៩ មីនា ឆ្នាំ២០២៥ នៅទីតម្កល់ធ្វើបុណ្យទក្ខិណានុបទានតាមប្រពៃណី ផ្ទះលេខ១៧ ផ្លូវ៣៣៥ ភូមិ២ សង្កាត់ បឹងកក់២ ខណ្ឌទួលគោក រាជធានីភ្នំពេញ។

ក្នុងព្រះនាម ព្រះអង្គម្ចាស់ នរោត្តម ចក្រាវុធ ព្រះប្រធានគណបក្សហ្វ៊ុនស៊ិនប៉ិច, ព្រះអង្គម្ចាស់ក្សត្រី នរោត្តម រតនទេវី បានសម្តែងនូវព្រះហឫទ័យសោកស្ដាយអាឡោះអាល័យបំផុត ចំពោះការបាត់បង់ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន រដ្ឋលេខាធិការក្រសួងសាធារណការ និងដឹកជញ្ជូន ត្រូវជាបងប្រុសបង្កើត សម្ដេចតេជោ ហ៊ុន សែន។ ជាមួយគ្នានោះ សម្ដេចព្រះអង្គម្ចាស់ក្សត្រី បានចាត់ទុកមរណភាពរបស់ ឯកឧត្តមអ្នកឧកញ៉ា ឧត្ដមមេត្រីវិសិដ្ឋ គឺជាការបាត់បង់យ៉ាងសោកស្តាយជាទីបំផុត នូវបងប្រុស ស្វាមី ឪពុក ឪពុកមា និងជីតា ដែលប្រកបដោយព្រហ្មវិហារធម៌ ជាទីគោរពស្រឡាញ់ និងជាម្លប់ដ៏កក់ក្តៅ សម្រាប់ក្រុមគ្រួសារ ព្រមទាំងជាការបាត់បង់នូវថ្នាក់ដឹកនាំមួយរូប ដែលពោរពេញដោយមនសិការស្នេហាជាតិ បាន លះបង់ តស៊ូ ទាំងកម្លាំងកាយ ចិត្ត ប្រាជ្ញា ស្មារតី ក្នុងការបម្រើជាតិមាតុភូមិដោយមិនខ្លាចនឿយហត់ ព្រមទាំងជា មហាឧបាសក ដែលតែងតែបរិច្ចាគទ្រព្យសម្បត្តិផ្ទាល់ខ្លួន ចូលរួមយ៉ាងសកម្ម ឧបត្ថម្ភ គាំទ្រដល់ពុទ្ធសាសនា បម្រើការងារមនុស្សធម៌ និងសង្គមជាតិ។

ក្នុងវេលាដ៏ក្រៀមក្រំនោះ, ព្រះអង្គម្ចាស់ក្សត្រី នរោត្តម រតនទេវី ព្រះតំណាងព្រះអង្គម្ចាស់ នរោត្តម ចក្រាវុធ លើកហត្ថឧទ្ទិសបួងសួងដល់ដួងវិញ្ញាណក្ខន្ធសពឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន សូមឆាប់បានចាប់កំណើតកើតក្នុងសុគតិភពកុំបីឃ្លៀងឃ្លាតឡើយ៕