ដើមឆ្នាំ២០២៥នេះរយៈពេលមិនដល់២០ថ្ងៃផងសហរដ្ឋអាមេរិកទទួលរងគ្រោះថ្នាក់ធ្លាក់យន្តហោះជាប់ៗគ្នា៥ករណីតូច-ធំដែលធ្វើឲ្យអ្នកដំណើរតាមផ្លូវអាកាសហាក់ ខ្លាចរអា

បញ្ហាវិស័យអាកាសចរណ៍អាម៉េរិកនាពេលថ្មីៗនេះ ក្រោយពីមានករណីធ្លាក់យន្តហោះជាហូរហែរបង្ហាញថាវាជាគ្រោះថ្នាក់ញឹកញាប់មិនធ្លាប់មានក្នុងរយៈពេលដ៏ខ្លីដើមឆ្នាំ២០២៥នៅទូទាំងសហរដ្ឋអាមេរិក។ មកដល់ពេលនេះអ្នកធ្វើដំណើរភាគច្រើនហាក់មានក្តីព្រួយបារម្ភអំពីការដំណើរហោះហើរតាមយន្តហោះទាំងយន្តហោះបែបពាណិជ្ជកម្ម និងមិនមែនពាណិជ្ជកម្ម។

១.ក្នុងរយៈពេលត្រឹមតែមួយសប្តាហ៍ឈានចូលដល់ចុងខែមករាឆ្នាំ២០២៥ ភ្លាម គឺនៅថ្ងៃទី២៩ខែមករាឆ្នាំ២០២៥ មានករណីឧទ្ធម្ភាគចក្រយោធាប្រភេទ Black Hawk និងជើងហោះហើរ American Airlines បានបុកគ្នានៅលើអាកាសផ្ទុះបែកផ្កាភ្លើងមួយរំពេចរួចធ្លាក់ចូលទឹកទន្លេ Potomac នារដូវត្រជាក់នៅជិតអាកាសយានដ្ឋានជាតិ Ronald Reagan Washington ក្នុងទីក្រុង Washington D.C. ដែលធ្វើឲ្យមនុស្សទាំង៦៧នាក់នៅលើយន្តហោះទាំងពីរស្លាប់គ្មានសល់ម្នាក់ ដែលភាគច្រើនគឺជាកីឡាករជើងឯកជិះស្គីលើទឹកកក ជាពិសេសគឺកីឡាករជនជាតិរុស្ស៊ី មូលហេតុគឺយន្តហោះទាំងពីរគ្រឿងនេះរៀបនឹងចុះចតដូចគ្នាដោយសារមានមួយគ្រឿងអាចនឹងមើលខុសគន្លងផ្លូវចុះចតលើអាកាស។ ហើយវាគ្រោះថ្នាក់កម្រនឹងកើតមានបណ្តាលឲ្យមានមនុស្សស្លាប់ច្រើនបំផុតក្នុងប្រវត្តិសាស្រ្តអាម៉េរិកមិនធ្លាប់មានអំឡុងជាងពីរទសវត្សរ៍មកនេះ។

២.រំលងបាន២ថ្ងៃគឺនៅថ្ងៃទី៣១ខែមករាគឺមានករណីយន្តហោះយោធាខ្នាតតូចប្រភេទ Medevac បានធ្លាក់ចុះក្បែរផ្សារទំនើប ហើយបានផ្ទុះឆាបឆេះយ៉ាងសន្ធោសន្ធៅក្នុងទីក្រុង Philadelphia ភាគឦសាន បានឆក់យកជីវិតមនុស្ស៧នាក់ និងរបួសនៅលើដី១៩នាក់ ដែលនេះគឺជាគ្រោះថ្នាក់ ដ៏គួរឲ្យសោកសង្រេងមួយទៀតគឺអំឡុងពេលដែលយន្តហោះខ្នាតតូចនោះបានដឹកជញ្ជូនក្មេងស្រីមានជំងឺម្នាក់មកព្យាបាលជាមួយនឹងម្តាយរបស់នាង ព្រមទាំងក្រុមការងារ Jet Rescue Air Ambulance ដែលមានមូលដ្ឋាននៅប្រទេសម៉ិកស៊ិក និងទទួលបានអាជ្ញាប័ណ្ណប្រតិបត្តិការនៅសហរដ្ឋអាមេរិក សម្លាប់អាកាសយានិក៤នាក់ និងមនុស្សម្នាក់នៅលើដី ដែលវាមិនត្រឹមតែធ្វើឱ្យមនុស្សនៅលើដីរងរបួសច្រើនប៉ុណ្ណោះទេ ថែមទាំងបានដុតឆាបឆេះដល់ផ្ទះ និងរថយន្តក្បែរខាងដែរ ជាមួយនឹងកំទេចកំទីយ៉ាងរប៉ាត់រប៉ាយ។

៣.បន្តមកនៅថ្ងៃទី ០៥ ខែកុម្ភៈ ឆ្នាំ ២០២៥ មានករណីស្លាបស្តាំនៃយន្តហោះ Japan Airlines បានបុកប៉ះកន្ទុយគ្នាជាមួយនឹងយន្តហោះ Delta Airlines (Delta Flight 1921) ប្រភេទ Boeing 727 ដែលមានអ្នកដំណើរ១៤២នាក់នៅលើតួយន្តហោះ អំឡុងពេលចុះចតនៅអាកាសយានដ្ឋានអន្តរជាតិ Seattle-Tacoma របស់សហរដ្ឋអាម៉េរិក។ យោងតាមរបាយការណ៍ជាច្រើនរបស់មន្ត្រីបានបញ្ជាក់ថាមិនមាននណាម្នាក់រងរបួសនោះទេ ដោយសារចំណាត់ការដាក់ជណ្តើរស្លាយទាន់ពេលវេលា។ ប៉ុន្តែវាបានរំខានដល់ជើងហោះហើរដទៃទៀត នេះបើយោងតាមគេហទំព័ររបស់ FAA ។ ក្រោយមកក្រុមហ៊ុនអាកាសចរណ៍ Japan Airlines បានចេញសេចក្តីថ្លែងការណ៍មួយទៅកាន់ USA Today ថា “យើងសូមអភ័យទោសដោយស្មោះអស់ពីចិត្តចំពោះអ្នកពាក់ព័ន្ធទាំងអស់សម្រាប់ភាពរអាក់រអួល ដោយក្រុមការងារកំពុងស៊ើបអង្កេតដូចគ្នា។

៤.ចូលដល់សប្តាហ៍ទី២ខែកម្ភៈ គឺនាថ្ងៃទី១០ខែកុម្ភៈ មានយន្តហោះឯកជនមួយគ្រឿងទៀតឈ្មោះ Vince Neil ប្រភេទ Learjet 35A ដែលជាកម្មសិទ្ធិរបស់តារាចម្រៀងជួរមុខដ៏ល្បីឈ្មោះ Mötley Crüe (ប៉ុន្តែគាត់មិនបានជិះទេ) ដោយវាបានបុកជាមួយយន្តហោះមួយគ្រឿងផ្សេងទៀតនៅរដ្ឋ Arizona ដែលធ្វើឲ្យអ្នកបើកបរម្នាក់ស្លាប់ ៣នាក់ទៀតរស់រានមានជីវិត។ ហើយនៅលើយន្តហោះខ្នាតតូចនោះគឺមានមនុស្ស៤នាក់ មានអ្នកបើកបរ២ និងមិត្តស្រីរបស់តារារ៉ុក Rain Andreani និងមិត្តរបស់នាងរងរបួសដែរ ព្រមទាំងមានសុនខ២ក្បាលនៅជាមួយដែរ ប៉ុន្តែពួកវាមិនមានរបួសធ្ងន់ធ្ងរទេ។

៥. បន្ទាប់មករំលងបាន២ថ្ងៃ នៅថ្ងៃទី១២ខែកុម្ភៈថ្មីៗនេះ ស្រាប់តែមានករណីធ្លាក់យន្តហោះចម្បាំងរបស់កងទ័ពជើងទឹកមួយគ្រឿងទៀតចូលទៅក្នុងឈូងសមុទ្រ San Diego ក្បែរកោះ Shelter បើយើងតាមរយៈសារព័ត៌មាន Fox 5 អាជ្ញាធរបានបញ្ជាក់ថា អ្នកបើកយន្តហោះទាំង២នាក់នៅលើយន្តហោះនោះត្រូវបានអ្នកនេសាទជួយសង្គ្រោះភ្លាមៗ ដែលមិនបណ្តាលឲ្យបាត់បង់ជីវិតនោះទេ។

សូមបញ្ជាក់ថាយោងតាមមេធាវីអាកាសចរណ៍ និងជាអតីតអ្នករុករកកងទ័ពអាកាសអាមេរិក លោក Jim Brauchle បានប្រាប់ Newsweek ថា “ករណីធ្លាក់យន្តហោះនៅអាម៉េរិកគឺវាអាចប្រហែលជារៀងរាល់ថ្ងៃឬអាចប្រហែលជាមិនមែនរាល់ថ្ងៃទេ ប៉ុន្តែប្រហែលគិតជាមធ្យម គឺស្មើនឹងស្ទើរតែរាល់ថ្ងៃក៏ថាបានដែរ គឺនៅទីតាំងខុសៗគ្នានៅសហរដ្ឋអាមេរិក។ លោកបានបន្ថែមថាករណីធ្លាក់យន្តហោះទាំងនោះគឺជាប់ពាក់ព័ន្ធនឹងយន្តហោះមិនមែនពាណិជ្ជកម្មភាគច្រើន «ស្ទើរតែ៩៩% ទៅហើយ»។

សម្រួលអត្ថបទ៖ សុផារិន្ទ