ដំណើរទស្សនកិច្ចរបស់មន្ត្រីរាជការនារី ក្នុងវិស័យព័ត៌មានជាង ២០០នាក់ មកកាន់ភូមិភាគឦសាន ដើម្បីស្វែងយល់ពីកិច្ចការពារបូរណភាពដែនដីនិងអធិបតេយ្យភាពរបស់កម្ពុជា

ដើម្បីចូលរួមសប្បាយរីករាយអបអរសាទរខួបទី ១១៤ ទិវាអន្តរជាតិនារី ៨ មីនា ឆ្នាំ២០២៥ សមាគមនារីកម្ពុជាដើម្បីសន្តិភាពនិងអភិវឌ្ឍន៍សាខាក្រសួងព័ត៌មាន បានរៀបចំដំណើរទស្សនកិច្ចរយៈពេល ២ថ្ងៃជូនមន្ត្រីរាជការនារី ក្នុងវិស័យព័ត៌មានជាង ២០០នាក់មកកាន់ភូមិភាគឦសានដើម្បីស្វែងយល់ពីកិច្ចការពារបូរណភាពដែនដីនិងអធិបតេយ្យភាពរបស់កម្ពុជា។

ដោយចាប់ផ្តើមដំណើរទស្សនកិច្ចនៅព្រឹកថ្ងៃទី៨ ខែមីនា ឆ្នាំ២០២៥ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកជំទាវ ទុយ សិរីរតនៈ នេត្រ ភក្ត្រា ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងព័ត៌មាន បានដឹកនាំមន្ត្រីរាជការនារី ក្នុងវិស័យព័ត៌មានជាង ២០០នាក់ បានអញ្ជើញមកទស្សនាបង្គោលព្រំដែនលេខ ១២៥ ក្នុងភូមិសាស្ត្រស្រុក ពញាក្រែក ខេត្តត្បូងឃ្មុំ និងបន្តមកកាន់ផ្លូវក្រវាត់ព្រំដែន ខេត្តក្រចេះ ដើម្បីស្វែងយល់ពីការពិតជាក់ស្តែងនៃកិច្ចការពារបូរណភាពទឹកដី និងអធិបតេយ្យភាពជាតិកម្ពុជា របស់រាជរដ្ឋាភិបាលកម្ពុជា ឱ្យបានគង់វង្ស ។

តាមរយៈកម្មវិធីដែលបានគ្រោងទុកនៃដំណើរទស្សនកិច្ចរបស់មន្ត្រីរាជការនារី ក្នុងវិស័យព័ត៌មាន រៀបចំឡើងដោយសមាគមនារី នឹងចុះធ្វើសកម្មភាពមនុស្សធម៌ និងការសិក្សាស្វែងយល់ពីសក្តានុពលនៃមូលដ្ឋានខេត្តក្រចេះ។ ខេត្តក្រចេះ ដែលជាមូលដ្ឋានចុះបំពេញការងាររាជរដ្ឋាភិបាលនិងការងារគណបក្សរបស់ក្រសួងព័ត៌មាន។ ឯកឧត្តម នេត្រ ភក្ត្រា ត្រូវបានចាត់ជាប្រធានក្រុមការងាររាជរដ្ឋាភិបាល និងជាប្រធានក្រុមការងារគណបក្សចុះមូលដ្ឋានខេត្តក្រចេះ។

ដំណើរទស្សនកិច្ចនេះនឹងបន្តទៅតំបន់ព្រំដែន ផ្លូវក្រវាត់ព្រំដែន និងបង្គោលព្រំដែនក្នុងខេត្តក្រចេះ ក៏ដូចជាវិមានអនុស្សាវរីយ៍ ២ធ្នូ ជាវិមានរណសិរ្សសាមគ្គី សង្គ្រោះជាតិកម្ពុជា ដែលជាការចាប់ផ្តើមនៃការបង្កើតរណសិរ្សសាមគ្គីសង្គ្រោះជាតិកម្ពុជា ដើម្បីវាយផ្តួលរំលំរបបកម្ពុជា ប្រជាធិបតេយ្យ ដែលដឹកនាំដោយសម្តេច ជា ស៉ីម សម្តេច ហេង សំរិន និងសម្តេចតេជោ ហ៊ុន សែន និងថ្នាក់ដឹកនាំផ្សេងៗទៀតរបស់គណបក្សប្រជាជនកម្ពុជា។

តាមរយៈការរៀបចំដំណើរទស្សនកិច្ចរបស់មន្ត្រីរាជការជាស្ត្រីក្នុងវិស័យព័ត៌មាន មកធ្វើទស្សនកិច្ចនៅតាមក្រវាត់ព្រំដែន បង្គោលព្រំដែន គឺដើម្បីឱ្យមន្ត្រីរាជការនារីបានយល់ច្បាស់អំពីអធិបតេយ្យភាពជាតិ បូរណភាពទឹកដី និងការងារការពារព្រំដែនរបស់រាជរដ្ឋាភិបាល។ ចំណុចនេះគឺជាការងារចាំបាច់ដែលមន្ត្រីរាជការទាំងអស់ត្រូវយល់ដឹងពីទឹកដីរបស់ខ្លួន និងកិច្ចការពារបូរណភាពទឹកដីជាដើម។

នៅក្នុងឱកាសនៃដំណើរទស្សនកិច្ច ឯកឧត្តមរដ្ឋមន្ត្រី នេត្រ ភក្ត្រា បានថ្លែងថា ដើម្បីការពារប្រទេសជាតិ ឱ្យបានរឹងមាំ គឺរាជរដ្ឋាភិបាលកម្ពុជាបានខិតខំប្រឹងប្រែងធ្វើការងារលំបាកជាច្រើនរហូតមកដល់បោះបង្គោលព្រំដែនកំណត់ដែនសីមាជាមួយប្រទេសជិតខាង ដោយឈរលើមូលដ្ឋាននៃផែនទី ឯកសារ និយាមការច្បាស់លាស់ដែលអ្នកជំនាញនៃប្រទេសទាំងពីរ បានធ្វើការជាមួយគ្នាយ៉ាងម៉ត់ចត់បំផុត។

ឯកឧត្តម រដ្ឋមន្ត្រី បានគូសបញ្ជាក់ថា ក្នុងការពារបូរណភាពទឹកដី និងព្រំដែនឲ្យបានច្បាស់គឺទី១. ត្រូវមានដែនទី ឯកសារ និងនិយាមការច្បាស់លាស់ ដែលមានការទទួលស្គាល់ពីប្រទេសទាំងពីរ ទី២. មានការបោះបង្គោលព្រំដែនជាក់ស្តែង ហើយការបោះបង្គោលនីមួយៗត្រូវការធានាឱ្យច្បាស់ពីភាពត្រឹមត្រូវតាមនិយាមការ ទី៣. ការកសាងផ្លូវក្រវាត់ព្រំដែន ដែលជាខ្សែក្រវាត់ដែនអធិបតេយ្យភាពទឹកដី ដ៏រឹងមាំ និងទី៤. ការកសាងអភិវឌ្ឍន៍ហេដ្ឋារចនាសម្ព័ន្ធផ្សេងៗ និងអភិវឌ្ឍន៍នៅក្នុងតំបន់ព្រំដែនតែម្តងដើម្បីឱ្យប្រជាពលរដ្ឋរស់នៅតំបន់ព្រំដែនមានជីវភាពល្អប្រសើរ។ ដំណើរទស្សនកិច្ចមន្ត្រីរាជការជាស្ត្រីក្នុងវិស័យព័ត៌មាន នឹងក្លាយជាទឡ្ហីករណ៍រស់ដ៏សំខាន់បញ្ជាក់ពីភាពច្បាស់លាស់ប្រាកដប្រជា និងឆន្ទៈមុះមុតរបស់រាជរដ្ឋាភិបាលកម្ពុជា ក្នុងការបន្តបេសកកម្ម ក្នុងការការពារអធិបតេយ្យភាពជាតិ បូរណភាពទឹកដី និងបន្តធានាសុខសន្តិភាព និងស្ថិរភាពសង្គម-សេដ្ឋកិច្ច សម្រាប់ជាប្រយោជន៍ដល់ជាតិ និងប្រជាជនកម្ពុជាទាំងអស់៕