នាថ្ងៃទី២៧ ខែមីនា ឆ្នាំ២០២៥ លោក ឡុង ឌីម៉ង់ អភិបាលរងខេត្តព្រះសីហនុ បានអញ្ជើញជាតំណាងឯកឧត្តមអភិបាល ដឹកនដឹកនាំគណៈប្រតិភូខេត្ត ចូលជួបសំដែងការគួរសម និងពិភាក្សាការងារជាមួយលោក ចាង គុមយ៉ុង (Jang Kum-Yung) អភិបាលរងក្រុង ឆាងវ៉ុន នៅសាលាក្រុងឆាងវ៉ុន។
ជាកិច្ចចាប់ផ្តើម លោកអភិបាលរងបានថ្លែងអំណរគុណដល់ការរៀបចំបដិសណ្ឋារកិច្ចយ៉ាងកក់ក្តៅ, ការអបអរសាទរពិធីបុណ្យផ្កាប្រចាំឆ្នាំ ជីនហេគុងហាំងជេ លើកទី៦៣ ព្រមទាំងសម្តែងសមានចិត្តនិងក្តីព្រួយបារម្ភអំពីស្ថានភាពភ្លើងឆេះព្រៃដែលប្រជាជនកូរ៉េកំពុងប្រឈម។
ឆ្លៀតក្នុងឱកាសនោះ បន្ថែមពីលើកិច្ចសហការផ្នែកវប្បធម៌ លោកអភិបាលរងបានស្នើឱ្យទីក្រុងឆាងវ៉ុន ដែលជាទីក្រុងសម្ព័ន្ធមេត្រីភាពជាមួយខេត្តព្រះសីហនុតាំងពីឆ្នាំ២០១៧ ពិនិត្យលទ្ធភាពពង្រឹងកិច្ចសហការលើផ្នែកសេដ្ឋកិច្ច និងវិនិយោគ និងបានលើកឡើងពីកម្មវិធីពិសេសជំរុញការវិនិយោគខេត្តព្រះសីហនុ ដែលជាយន្តការរបស់រាជរដ្ឋាភិបាលសម្រាប់ជំរុញកំណើនសេដ្ឋកិច្ចជាតិឆ្ពោះទៅសម្រេចបានចក្ខុវិស័យឆ្នាំ២០៥០។
ជាការឆ្លើយតប លោកអភិបាលរងក្រុងឆាងវ៉ុន បានលើកឡើងថា ថ្មីៗនេះវិនិយោគិនកូរ៉េ មាននិន្នាការវិនិយោគក្រៅប្រទេស នៅប៉ែកអាស៊ីអាគ្នេយ៍ ជាពិសេសប្រទេសកម្ពុជា។
