នាយករដ្ឋមន្ត្រីថៃ Paetongtarn  Shinawatra កំពុងប្រឈមនឹង ការដកទំនុកចិត្តពីសភាថៃ ព្រោះតែទម្លាប់ធ្វើការក្រោមឥទ្ធិពលរបស់ឪពុក ខណៈមិនអាចធ្វើឲ្យសេដ្ឋកិច្ចថៃកើនឡើងនិងមិនអាចប្រជែងជាមួយប្រទេស ក្នុងតំបន់អាស៊ីអាគ្នេយ៍បាន

ស្ថិតក្នុងអង្គប្រជុំជាមួយនឹងសមាជិកសភាថៃនាព្រឹកថ្ងៃចន្ទទី២៤ខែមិនាឆ្នាំ២០២៥នេះលោកស្រីនាយករដ្ឋមន្ត្រីថៃ Paetongtarn Shinawatra កំពុងប្រឈមមុខនឹងការដកសេចក្ដីទុកចិត្ត ឬ គ្មានទំនុកចិត្តនៅក្នុងរដ្ឋសភាថៃហើយ ដោយសារគណបក្សប្រឆាំងថៃគ្រោងនឹងសួរនាំលោកស្រីបន្ថែម ជុំវិញវិធីសាស្រ្តដោះស្រាយបញ្ហាសេដ្ឋកិច្ចមិនបានល្អដូចការរំពឹងទុករបស់ម្ចាស់សម្លេងឆ្នោត និង សមាជិកសភា និងការចោទប្រកាន់ថារដ្ឋាភិបាលរបស់លោកស្រីគឺស្ថិតនៅក្រោមឥទ្ធិពលនៃឪពុករបស់លោកស្រីដដែល។ នេះបើយោងតាមការចេញផ្សាយដោយសារព័ត៌មានក្នុងស្រុកនិងក្រៅស្រុកនៅថ្ងៃនេះ។ ទោះបីជាទទួលបានអត្រាគាំទ្រខ្ពស់នៅក្នុងការស្ទង់មតិក៏ដោយ ក៏លោកស្រី Paetongtarn បានចូលរួមក្នុងកិច្ចជជែកដេញដោលគ្នាជាមួយនឹងជំហរដ៏រឹងមាំ ដោយគ្មានសញ្ញាចលាចលណាមួយនៅក្នុងរដ្ឋាភិបាលចម្រុះរបស់លោកស្រីឡើយ ដែលមានសំឡេងគាំទ្រភាគច្រើននៅក្នុងរដ្ឋសភានោះដដែល ដែលវាមិនទំនងនោះទេ ដែលនឹងត្រូវមានញត្តិដកសេចក្ដីទុកចិត្តរបស់លោកស្រី អាចនឹងត្រូវបានអនុម័តនៅក្នុងការបោះឆ្នោតដែលគ្រោងធ្វើឡើងនៅថ្ងៃពុធសប្ដាហ៍នេះដែរ។គណបក្សប្រជាជន (People’s Party) ដែលជាបក្សប្រឆាំងក្នុងប្រទេសថៃ បានចោទប្រកាន់លោកស្រី Paetongtarn ថា កំពុងអនុវត្តតាមបទបញ្ជាពីឪពុករបស់ខ្លួនឯង គឺលោក Thaksin Shinawatra ដែលជាអតីតនាយករដ្ឋមន្រ្តីថៃ។ ទាក់ទិននឹងបញ្ហានេះដែរ លោកស្រី Paetongtarn បានច្រានចោលការចោទប្រកាន់នេះ ហើយទទូចថារដ្ឋាភិបាលរបស់លោកស្រីមិនស្ថិតនៅក្រោមឥទ្ធិពលរបស់នរណាម្នាក់នោះទេ ខណៈលោក Thaksin ដែលជាឪពុកមានវ័យ៧៥ឆ្នាំទៅហើយ ហើយលោកក៏បានចូលនិវត្តដែរ ប៉ុន្តែលោកនៅតែអាចផ្ដល់ត្រឹមតែយោបល់មកកាន់លោកស្រីតែប៉ុណ្ណោះក្នុងនាមជាឳពុកនិងកូនស្រីពៅ។ យ៉ាងណាម៉ិញដំណើរការគ្រប់គ្រងប្រទេសរបស់លោកស្រីទាក់ទងនឹងវិធានការសេដ្ឋកិច្ចរបស់រដ្ឋាភិបាលថៃ ក្រោមការដឹកនាំរបស់លោកស្រី Paetongtarn ខ្លួនឯងរហូតមកដល់ពេលនេះ គឺត្រូវគេមើលឃើញថាមិនទាន់បានជំរុញឱ្យសេដ្ឋកិច្ចថៃមានកំណើនគួរឱ្យកត់សម្គាល់តាមការរំពឹងទុកនៅក្នុងប្រទេសថាជាប្រទេសមានសេដ្ឋកិច្ចធំទី២ នៅអាស៊ីអាគ្នេយ៍នៅឡើយនោះទេ ដោយគ្រាន់តែអត្រាកំណើនមានត្រឹម ២.៥%ប៉ុណ្ណោះកាលពីឆ្នាំ២០២៤ គឺទាបជាងអត្រាកំណើនសេដ្ឋកិច្ចរបស់ប្រទេសដៃគូក្នុងតំបន់ទៅទៀត។ ប៉ុន្តែលោកស្រីឆ្លើយតបយ៉ាងខ្លីថាសមាជិកបក្សប្រឆាំងមើលតែមួយផ្នែកតូច ចុះជោគជ័យដែលរដ្ឋាភិបាលថៃធ្វើបានផ្សេងទៀតដូចជាការដោះស្រាយបញ្ហាហេដ្ឋារចនាសម្ព័ន្ធកើនឡើង និងដោះបំណុលទូទៅចំនួន១៦.៣៤ទ្រីលានបាត ស្មើនឹង៤៨៦ ប៊ីលានដុល្លារ) ឬស្មើនឹង៨៩% នៃផលិតផលក្នុងស្រុកសរុប ដែលជាសមាមាត្រខ្ពស់បំផុតនៅអាស៊ីនេះ ហេតុអ្វីក្រុមប្រឆាំងមិននិយាយផង ហើយហេតុអ្វីនិយាយថារដ្ឋាភិបាលមិនដោះស្រាយអ្វីសោះនោះ។ សូមបញ្ជាក់ថាមកដល់ពេលនេះលោកស្រីនាយករដ្ឋមន្ត្រីថៃ Paetongtarn Shinawatra ដែលជាទីយាទរបស់លោក Thaksin Shinawatra ជាអតីតនាយករដ្ឋមន្រ្តីថៃទី២៣ ចាប់ពីឆ្នាំ២០០១ដល់ឆ្នាំ២០០៦ លោកស្រីបានឡើងកាន់អំណាចបានប្រមាណជា៧ខែនិង៦ថ្ងៃហើយ។  លោកស្រី Paetongtarn អាយុ៣៨ឆ្នាំដែលជាសមាជិកទី៤ នៃគ្រួសារ Shinawatra ដែលកាន់តំណែងកំពូលក្នុងប្រទេសថៃ មិនបានឆ្លើយតបច្រើន ឬ ប្រតិកម្មទៅនឹងការចោទប្រកាន់របស់លោក Natthaphong នោះទេ។ សូមរំលឹកថាលោក  Thaksin Shinawatra ដែលជាឳពុករបស់លោកស្រី Paetongtarn  Shinawatra គឺជាអ្នកនយោបាយដ៏មានឥទ្ធិពលនិងមានប្រជាប្រិយបំផុតនៅក្នុងប្រទេសថៃ ហើយគ្រួសាររបស់លោកបានលេចមុខលេខមាត់ធំធេងណាស់លើឆាកនយោបាយថៃក្នុងរយៈពេល២៤ឆ្នាំកន្លងមកនេះ។ លោក Thaksin Shinawatra ធ្លាប់បានត្រលប់មកស្រុកកំណើតវិញនៅឆ្នាំ ២០២៣ ហើយបានចំណាយពេល ៦ខែនៅក្នុងមន្ទីរឃុំឃាំងមន្ទីរពេទ្យក្រោមរដ្ឋាភិបាលដែលដឹកនាំដោយគណបក្សភឿថៃដែលលោកបានបង្កើតមុនពេលរូបលោកត្រូវបានគេដោះលែងឱ្យនៅក្រៅឃុំវិញដែរ៕ 

សម្រួលអត្ថបទ៖ សុផារិន្ទ