ផ្តល់ក្ដីស្រលាញ់ជូនសិស្សានុសិស្សក្នុងថ្ងៃទិវាអន្តរជាតិនារី ៨មីនា ឯកឧត្តមរដ្ឋមន្ត្រី នេត្រ ភក្ត្រា និងលោកជំទាវ រួមទាំងមន្ត្រីរាជការជាស្ត្រីក្នុងវិស័យព័ត៌មានជាង ២០០នាក់ អញ្ជើញចែកសម្ភារៈសិក្សាដល់សិស្សតូចៗក្នុងស្រុកចិត្របុរី ចំនួនជាង ៥០០នាក់

ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងនិងលោកជំទាវ ទុយ សិរីរតនៈ នេត្រ ភក្ត្រា ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងព័ត៌មាន រួមជាមួយមន្ត្រីរាជការនារីក្នុងវិស័យព័ត៌មានប្រមាណជាង ២០០នាក់ បាននាំយកនូវសម្ភារៈសិក្សាជាអំណោយរបស់ ក្រុមហ៊ុន GWM , One Road Group អង្គការមូលនិធិសប្បុរសធម៌ វ័នរ៉ូដ មកចែកជូនដល់សិស្សានុសិស្សចំនួន ៥៣៣នាក់ ក្នុងនោះសិស្សស្រី ២៦០នាក់ មកពីសាលាបឋមសិក្សាចំនួន៣ ក្នុងស្រុកចិត្របុរី ខេត្តក្រចេះ ។

ពិធីចែកអំណោយនេះធ្វើឡើងនៅរសៀលថ្ងៃទី៨ ខែមីនា ឆ្នាំ២០២៥ នាបរិវេណវត្ត គីរីរុក្ខាវរាម ហៅវត្តអាលច ភូមិអាលច ឃុំកន្ទួត ស្រុកចិត្របុរី ខេត្តក្រចេះ ដោយមានការអញ្ជើញចូលរួមពីលោកជំទាវ Teo Lay Cheng ឯកអគ្គរដ្ឋទូតសឹង្ហបុរី ប្រចាំនៅកម្ពុជា និងលោក Kevin Luo នាយកប្រតិបត្តិ និងជាស្ថាបនិក ក្រុមហ៊ុន Oneroad Group (Cambodia) Co., Ltd. ព្រមទាំងជាប្រធាន អង្គការមូលនិធិសប្បុរសធម៌ វ័នរ៉ូដ។

ឯកឧត្តម រដ្ឋមន្ត្រី នេត្រ ភក្ត្រា ប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះបានថ្លែងថា ចូលរួមផ្តល់ក្តីស្រឡាញ់ ភាពសប្បាយរីករាយ និងក្តីសង្ឃឹម ពិសេសផ្តល់ការអប់រំ បង្រៀនដល់កុមារ ជាសិស្សានិសិស្សចាប់ពីវ័យតូចទៅដើម្បីពួកគេក្លាយខ្លួនជាកូនល្អ សិស្សល្អ និងជាពលរដ្ឋល្អសម្រាប់សង្គមជាតិនាថ្ងៃអនាគត ។ ឯកឧត្តម បានគូសបញ្ជាក់បន្ថែមថា យើងទាំងគ្នាបន្តខិតខំប្រឹងប្រែងធ្វើយ៉ាងណាក្នុងការផ្តល់ស្នាមញញឹម និងភាពសប្បាយរីករាយកាន់តែច្រើនដល់សិស្សានុសិស្សនៅតាមទីជនបទតាមរយៈការផ្តល់ការគាំទ្រជាសម្ភារសម្រាប់សិក្សា ដើម្បីឲ្យគាត់ប្រឹងប្រែងសិក្សារៀនសូត្របានពូកែ និងមានភាពក្លាហានក្នុងការសិក្សា ហើយការលើកទឹកចិត្តដល់កុមារ ព្រោះកុមារតំណាងឲ្យធនធានសក្តានុពលរបស់ប្រទេសជាតិ ដែលនឹងត្រូវបន្តវេននាពេលអនាគត។ ដូច្នេះហើយ ឯកឧត្តម រដ្ឋមន្ត្រី បានជំរុញលើកទឹកចិត្តដល់សិស្សានុសិស្សទាំងអស់ ត្រូវបន្តខិតខំប្រឹងប្រែងរៀនសូត្រ ធ្វើជាសិស្សល្អ កូនល្អ មិត្តល្អ និងជាពលរដ្ឋល្អ ព្រោះក្មួយៗគឺជាធនធានមនុស្សប្រកបដោយចំណេះនិងជំនាញពិតប្រាកដ បន្តវេនកសាង និងអភិវឌ្ឍប្រទេសជាតិឱ្យកាន់តែរីកចម្រើនបន្ថែមទៀត។ ជាមួយនេះនៅពេលដែល ក្មួយៗសិស្សានុសិស្សរៀនសូត្របានពូកែ ធំឡើងមានការងារធ្វើល្អ មានប្រាក់ចំណូលច្រើន អាចចិញ្ចឹមឳពុក ម្តាយ ក្រុមគ្រួសារ និងចូលរួមកសាង អភិវឌ្ឍ ភូមិ ឃុំ ស្រុករបស់យើងឲ្យមានការរីចម្រើនបន្តទៀត ។ ក្នុងឱកាសនេះដែរ ឯកឧត្តមរដ្ឋមន្ដ្រី នេត្រ ភក្ត្រា បានសម្តែងនូវអំណរគុណយ៉ាងជ្រាលជ្រៅដល់ក្រុមហ៊ុន Great Wall Motor (GWM) និងអង្គការមូលនិធិសប្បុរសធម៌ វ័នរ៉ូដ ដែលបានផ្តល់សម្ភារៈសិស្សដល់ក្រសួងព័ត៌មាន ដើម្បីចែកជូនដល់កុមារា កុមារីសិស្សានុសិស្ស។ សិស្សានុសិស្សដែលទទួលបានសម្ភារៈសិក្សានាឱកាសនេះ មកពីសាលចំនួន៣ រួមមាន សាលាបឋមសិក្សាទេចម្លង, សាលាបឋមសិក្សាអន្លង់កេះ និងសាលាបឋមសិក្សាអាលច នៅក្នុងស្រុកចិត្របុរី សរុបជាង ៥០០នាក់ ដោយក្នុងម្នាក់ៗទទួលបានកាតាប១ រួមជាមួយសម្ភារៈសិក្សាជាច្រើនមុខ ដបដាក់ទឹក១ និងនំថែមទៀតផងដែរ។

លោក យិន វណ្ណៈ អភិបាលស្រុកចិត្របុរី ខេត្តក្រចេះ បានជម្រាបជូនថា វិស័យអប់រំ យុវជន និងកីឡា ស្រុកចិត្របុរី ក្នុងឆ្នាំ សិក្សា២០២៤ -២០២៥ មានកម្រិតមត្តេយ្យសិក្សា៖
មត្តេយ្យសិក្សាសហគមន៍ ចំនួន ៣៨កន្លែង ស្មើនឹងថ្នាក់រៀន ៤១ថ្នាក់ កុមារបានចូលរៀនសរុប ១ ០៤៥នាក់ ស្រី ៥៥២នាក់, គ្រូបង្រៀនជាប់កិច្ចសន្យាសហគមន៍ មានចំនួន៤១នាក់ ស្រី៤១នាក់។ មត្តេយ្យសិក្សារដ្ឋមានចំនួន ២១កន្លែងស្មើនឹងថ្នាក់រៀន ៣១ថ្នាក់ កុមារបានចូលរៀនចំនួន ៨០០នាក់ ស្រី៤១០នាក់,គ្រូមត្តេយ្យសិក្សាចំនួន ៣២នាក់។ កម្រិតបឋមសិក្សា៖ សាលាបឋមសិក្សាមានចំនួន ៥៩សាលា ស្មើនឹងថ្នាក់រៀនចំនួន ៤៤៦ថ្នាក់ កុមារចូលរៀនសរុបចំនួន ១០.៧៦៨នាក់ ស្រី ៥.២៨០នាក់ គ្រូបង្រៀនសរុប ចំនួន ៤៦១នាក់ ក្នុងនោះគ្រូបង្រៀនជាប់កិច្ចសន្យា ៨៥នាក់ ស្រី ៥៨នាក់។ កម្រិតមធ្យមសិក្សាបឋមភូមិ៖ សាលាមធ្យមសិក្សាបឋមភូមិមានចំនួន១០សាលាស្មើនឹងថ្នាក់រៀន៥៦ថ្នាក់ កុមារចូលរៀនសរុបចំនួន ២,៤១០នាក់ ស្រី១៣៨៤នាក់ គ្រូបង្រៀនចំនួន១២១នាក់ ស្រី៦២នាក់។ កម្រិតមធ្យមសិក្សាទុតិយភូមិ៖ សាលាមធ្យមសិក្សាទុតិយភូមិមានចំនួន២សាលាស្មើនឹងថ្នាក់រៀន១៥ថ្នាក់ មានចំនួនសិស្សពីថ្នាក់ទី (១០ដល់១២) សរុប ៧០១នាក់ ស្រី ៤១៤នាក់ គ្រូបង្រៀនចំនួន៣៨នាក់ ស្រី ១៩នាក់៕