ផ្អើលអស់ពិភពលោក! ប្រធានាធិបតីអាម៉េរិកលោក Donald Trump ព្រលះប្រធានាធិបតីអ៊ុយក្រែន Zelenskyy ប៉ុន្មានឃ្លាពាក់ព័ន្ធនឹងការផ្តល់ជំនួយសង្រ្គាមរវាងរុស្ស៊ី-អ៊ុយក្រែន

ប្រធានាធិបតីអាមេរិកលោក Donald Trump បាននិយាយរិះគន់លោក Volodymyr Zelenskyy ធ្ងន់ៗម្តងហើយម្តងទៀត ដោយបានហៅប្រធានាធិបតីអ៊ុយក្រែនថាជា “ជនផ្តាច់ការដោយគ្មានអ្នកបោះឆ្នោតគាំទ្រទេ” និងបន្ទោសលោកចំពោះចេតនាបញ្ឆេះសង្រ្គាមដែលកំពុងបន្តដែរ។ ប៉ុន្តែការពិតទៅ លោក Zelenskyy ត្រូវបានគេបោះឆ្នោតជ្រើសរើសក្នុងឆ្នាំ ២០១៩។ លោក Trump បន្ថែមថា “រឿងតែមួយគត់ដែលមេដឹកនាំពូកែគឺការលេងល្បែងបញ្ជោរដូចចាក់ចេកចាក់ស្កចំពោះលោក Joe Biden យ៉ាងល្អូកល្អើនទៅវិញទេ”។ លោក Trump បាននិយាយអំពីលោក Zelenskyy ដោយបន្ថែមថា មេដឹកនាំអ៊ុយក្រែនចង់ឱ្យពួកយើងបន្តសង្រ្គាម “ដើម្បីរក្សាការផ្គត់ផ្គង់នានានៅលើរថភ្លើងរបស់ពួកគេ ដែលកំពុងតែរខេករខាកប៉ុណ្ណោះ” ។ លោកបានអះអាងម្តងទៀតថា អ៊ុយក្រែនបានប្រើថវិកាអាមេរិកខុសគោលដៅច្រើនណាស់ប៉ុន្តែបែរជួយជម្រុញលើកស្ទួយមុខមាត់និងតួនាទីរបស់អឺរ៉ុបកាន់តែខ្លាំងទៅវិញ។ លោក Trump បាននិយាយថា “ខ្ញុំស្រឡាញ់អ៊ុយក្រែន ប៉ុន្តែ លោក Zelenskyy បានធ្វើការងារដ៏អាក្រក់មួយ ដែលធ្វើឲ្យយើងមិនអាចទទួលយកបាន”។ លោក Trump សង្កត់ធ្ងន់ថា៖ អ្នកទាំងអស់គ្នាគិតទៅ លោក Volodymyr Zelenskyy ប្រៀបដូចជាតារាកំប្លែងដ៏ជោគជ័យម្នាក់អញ្ចឹង លោកបាននិយាយថាសហរដ្ឋអាមេរិកត្រូវចំណាយថវិកា៣៥០ប៊ីលានដុល្លារអាម៉េរិក ដើម្បីចូលរួមធ្វើឲ្យអ៊ុយក្រែនឈ្នះសង្រ្គាមមួយនេះ ប៉ុន្តែសង្រ្គាមដែលពួកគេធ្វើនោះគឺគ្មានចំណេញអីដល់សហរដ្ឋអាមេរិក និង “លោក TRUMP” ទេ ហើយនឹងមិនអាចដោះស្រាយបានដែរ។

កន្លងទៅសហរដ្ឋអាមេរិកបានចំណាយថវិកា២០០ប៊ី លានដុល្លាររួចទៅហើយ ដែលច្រើនជាងអឺរ៉ុបទៅទៀត ប៉ុន្តែថវិការបស់អឺរ៉ុបត្រូវបានគេធានា ខណៈដែលសហរដ្ឋអាមេរិកនឹងមិនទទួលបានអ្វីមកវិញទាល់តែសោះ។ លើសពីនេះកន្លងទៅលោក Zelenskyy ក៏បានធ្លាប់បានសារភាពថាពាក់កណ្តាលនៃថវិកាដែលយើងផ្តល់ឲ្យលោកគឺ “ត្រូវបាត់” ប៉ុន្តែមិនបានបញ្ជាក់ថាបាត់ដោយសារអ្វីពិតប្រាកដនោះទេ។ លោក Trump បញ្ជាក់ទៀតថា «ប្រទេសរបស់លោក Zelenskyy ត្រូវបានខ្ទេចខ្ទាំ ហើយមនុស្សរាប់លាននាក់ក៏បានស្លាប់ច្រើនដែរពីសង្រ្គាមដែរ»។ ការវាយតម្លៃរបស់លោក Trump គឺផ្ទុយស្រឡះជាមួយនឹងមនោសញ្ចេតនាដោយក្តីសង្ឃឹមនិងធ្លាន់កើតមានពីសំណាក់លោក Zelenskyy ដែរ បន្ទាប់ពីការលុកលុយរបស់រុស្ស៊ីកាលពីឆ្នាំ ២០២២ នៅពេលដែលសមរភូមិអ៊ុយក្រែនទទួលបានជោគជ័យដោយប្រកាសប្រឆាំងនឹងរុស្ស៊ី និងស្ថិតក្រោមការដឹកនាំរបស់លោក Zelenskyy គឺជាប្រភពនៃការបំផុសគំនិតទៅឲ្យប្រទេសលោកខាងលិច។

សូមបញ្ជាក់ថាមុនពេលលោក Trump ជាប់ឆ្នោតអាណត្តិទី២របស់អាម៉េរិក លោកTrump ធ្លាប់ព្រលយពាក្យថានឹងព្យាយាមពន្លត់សង្រ្គាមរុស្ស៊ី-អ៊ុយក្រែន ប៉ុន្តែលោកក៏មិនបានបញ្ជាក់ច្បាស់ថាដោះស្រាយដោយវិធីសាស្រ្តអ្វីដែរ ហើយមុនពេលហេតុការណ៍លោក Trump ទះកំផ្លៀងអ៊ុយក្រែនដោយពាក្យសំដីទាំងអស់នេះ គឺប៉ុន្មានថ្ងៃមុនលោកប្រធានាធិបតី Volodymyr Zelenskyy តែងតែអះអាងថាលោកមិនចូលតុចរចារសន្តិភាពទេ ប្រសិនបើគ្មានអាម៉េរិក ដែលជាចេតនាមួយបញ្ជាក់ថា លោកចាត់ទុកអាម៉េរិកសំខាន់ណាស់សម្រាប់សង្រ្គាមមួយនេះ ប៉ុន្តែថ្ងៃនេះលោកបានភ្លឺភ្នែកថាអាម៉េរិកគឺមិនបានចំណេញអ្វីទាំងអស់ពីសង្រ្គាម រុស្ស៊ី-អ៊ុយក្រែនជាង៣ឆ្នាំមកនេះ៕

សម្រួលអត្ថបទ៖ សុផារិន្ទ