“ព្រឹត្តិការណ៍អង្គរសង្ក្រាន្ត ២០២៥ ចាប់ផ្តើមបើកការដ្ឋានហើយ ឯកឧត្តម ហ៊ុន ម៉ានី និងឯកឧត្តម ស សុខា ចូលរួមពិធីបួងសួងសុំសេចក្តីសុខសុភមង្គល”

នៅព្រឹកថ្ងៃទី៩ ខែមីនា ឆ្នាំ២០២៥នេះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក.) ដោយមានការចូលរួមពីឯកឧត្តម អភិសន្តិបណ្ឌិត ស សុខា អនុប្រធានសហភាពសហព័ន្ធយុវជនកម្ពុជា និងជាប្រធានការងារចង្កោមទី៣ នៃគណៈកម្មការរៀបចំព្រឹត្តិការណ៍អង្គរសង្ក្រាន្ត បានអញ្ជើញជាអធិបតីក្នុហពិធីបួងសួង និងបើកការដ្ឋានព្រឹត្តិការណ៍អង្គរសង្ក្រាន្ត ឆ្នាំពុទ្ធសករាជ ២៥៦៨ គ្រិស្តសករាជ ២០២៥។

សូមជម្រាបថា៖ព្រឹត្តិការណ៍អង្គរសង្ក្រាន្ត ២០២៥ រៀបចំឡើងមានគោលបំណងលើកកម្ពស់វប្បធម៌ ប្រពៃណី និងការអភិវឌ្ឍន៍ទេសចរណ៍វប្បធម៌។ ព្រឹត្តិការណ៍នេះ គឺជាឱកាសដ៏ល្អសម្រាប់បង្ហាញពីព្រលឹងវប្បធម៌ខ្មែរ និងទាក់ទាញភ្ញៀវទេសចរជាតិ និងអន្តរជាតិមកទស្សនាក្នុងទឹកដីបុរាណបៃតងនៃខេត្តសៀមរាប។

ការចូលរួមយ៉ាងសកម្មពីសំណាក់មន្ត្រីរាជការ អាជ្ញាធរមូលដ្ឋាន និងប្រជាពលរដ្ឋ បានបង្ហាញឱ្យឃើញពីក្តីស្រឡាញ់វប្បធម៌ និងភាពរួសរាយរាក់ទាក់របស់ប្រជាជនខ្មែរ។ ពិធីបើកការដ្ឋាននេះ មិនត្រឹមតែបង្កើតអារម្មណ៍នៃភាពរីករាយ និងសុភមង្គលប៉ុណ្ណោះទេ ប៉ុន្តែក៏បានបង្កើនសក្តានុពលសម្រាប់ការអភិវឌ្ឍន៍សេដ្ឋកិច្ច និងសង្គមនៅក្នុងតំបន់ផងដែរ។