ព្រះមន្ត្រីសង្ឃខ្មែរ ខេត្តត្រាវិញ សាធារណរដ្ឋសង្គមនិយមវៀតណាម ៦ព្រះអង្គ បាននិមន្តមកដល់ព្រះរាជាណាចក្រកម្ពុជាហើយនៅរសៀលថ្ងៃនេះ

ព្រះមន្ត្រីសង្ឃខ្មែរ ខេត្តត្រាវិញ ៦ព្រះអង្គ ដឹកនាំព្រះតេជព្រះគុណ ថាច់ ញ៉ឹក ព្រះចៅអធិការវត្តស្វាយសៀមថ្មី បាននិមន្តមកដល់ព្រះរាជាណាចក្រកម្ពុជា កាលពីវេលាម៉ោង ១៣:៣០ នាទី រសៀល ថ្ងៃទី២៥ ខែវិច្ឆិកា ឆ្នាំ២០២៤ ដោយមានការទទួលពីតំណាងក្រសួងធម្មការនិងសាសនា រដ្ឋបាលខេត្តកណ្តាល ឯកឧត្តម សាង សាន និងឯកឧត្តម មាស រដ្ឋា នៅច្រកអន្តរជាតិកម្ពុជា វៀតណាម ជ្រៃធំ។

គណៈប្រតិភូនឹងនិមន្តបំពេញទស្សនកិច្ចនៅក្នុងព្រះជាណាចក្រកម្ពុជារយៈពេល៧ថ្ងៃ ចាប់ពីថ្ងៃទី២៥ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០២៤ ។ ក្នុងដំណើរទស្សនៈកិច្ចនេះ ព្រះអង្គនឹងចូលក្រាបបង្គំគាល់សម្តេចព្រះមហាសង្ឃរាជទាំង២គណៈ សម្តេចសង្ឃនាយស្តីទី នៃគណៈមហានិកាយ និងជួបសំណេះសំណាលជាមួយថ្នាក់ដឹកនាំ ដើម្បីថ្លែងអំណរព្រះគុណ និងអរគុណដោយផ្ទាល់ដល់សម្តេចព្រះមន្ត្រីសង្ឃ និងថ្នាក់ដឹកនាំគ្រប់លំដាប់ថ្នាក់ មហាពុទ្ធបរិស័ទគ្រប់ទិសទី ដែលមានសទ្ធាជ្រះថ្លា លះបង់អស់កម្លាំងកាយ កម្លាំងចិត្ត និងកម្លាំងទ្រព្យ រៀបចំអង្គកឋិនទានមហាសាមគ្គីគ្រួសារខ្មែរ ក្រោមគំនិតផ្តួចផ្តើមដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានដង្ហែអង្គកឋិនទានមហាសាមគ្គីគ្រួសារខ្មែរទៅកាន់វត្ត ស្វាយសៀមថ្មី ខេត្តត្រាវិញ កាលពីថ្ងៃទី ៣,៤,៥ ខែវិច្ឆិកា ឆ្នាំ២០២៤ កន្លងទៅ។

ទន្ទឹមនឹងនោះគណៈប្រតិភូក៏ធ្វើកាសិក្សាស្វែងយល់បន្ថែមទៀតពីការបដិបតិបត្តិធម៌វិន័យ និងការអភិរក្សមរតក៌ប្រពៃណី ទំនៀមទំលាប់ របស់ខ្មែរនៅក្នុងដំណាក់កាលនៃសន្តិភាពនេះ។
ព្រះអង្គបានមានថេរដីការថា ព្រះមន្ត្រីសង្ឃខ្មែរ ប្រជាពុទ្ធបរិស័ទខ្មែរ ព្រមទាំងប្រជាពលរដ្ឋខ្មែរខេត្តត្រាវិញ បានចាត់ទុកអង្គកឋិនទានកន្លងមក ជាប្រវត្តិសាស្ត្រ ដែលប្រព្រឹត្តទៅដើម្បីភាតរភាព មិត្តភាព និងសាមគ្គីភាព ក្នុងចំណោមមហាពុទ្ធបរិស័ទក្រោមដំបូលនៃសុខសន្តិភាព៕