រដ្ឋបាលរាជធានីភ្នំពេញ ដាក់លូរំដោះទឹកភ្លៀងមានអង្កត់ផ្ចិត១,២ម៉ែត្រម្ខាងផ្លូវ ប្រវែងបណ្តាយសរុបជាង៥០០ម៉ែត្រ  លើកំណាត់ផ្លូវសួនសម្តេច ហ៊ុន សែន មាត់ទន្លេ ចាប់ពីកែងស្ពាននាគភ្លោះកោះពេជ្រ មកកែវតំបន់រង្វង់មូលសម្តេចសង្ឃរាជ ជូន ណាត  ខណ្ឌដូនពេញ ។

រដ្ឋបាលរាជធានីភ្នំពេញ ដោយមានមន្ទីរសាធារណការ និងដឹកជញ្ជូនរាជធានីភ្នំពេញ ជាសេនាធិការ បានសហការជាមួយ ក្រុមហ៊ុន Phnom Penh Precast Plants បានអនុវត្តន៍គម្រោងដាក់លូដ៏ធំ មានទទឹង១,២ម៉ែត្រ ប្រវែងសរុបជាង៥០០ម៉ែត្រថ្មី ដាក់ក្នុងជំម្រៅ២ម៉ែត ប្រកបដោយគុណភាព សុវត្ថិភាពការងារ (សម្រេចបាន៥៥%) ក្រាល់ខ្សាច់បាត ស្ថិតក្នុងសង្កាត់ទន្លេបាសាក់ នៅលើកំណាត់ផ្លូវមាត់ទន្លេ ដែលជាប្រព័ន្ធលូមេធំ រំដោះការជន់លិចទឹកភ្លៀងហើយត្រូវហូឆ្ពោះមកទន្លេ គឺជាយុទ្ធសាស្ត្រដ៏សំខាន់ នៃការបញ្ជៀសរំដោះការលិចទឹក តីរៈវិថី ព្រះសុីសុវត្ថិ វិថី រដ្ឋសភា តំបន់រង្វង់មូល ជូនណាត តំបន់សាកលវិទ្យាល័យBBU តំបន់នាគបាញ់ទឹក និងទទួលទឹកហូបន្តពីភូមិសាស្រ្តសង្កាត់ទន្លេបាសាក់ មួយផ្នែកផង ជាពិសេសរំដោះការលិចទឹកលើកកំណាត់តីរវិថី ព្រះសុីសុវត្ថិ  តំបន់កាំបូឌីយ៉ាណា និងរង្វង់មូលសម្តេចសង្ឃរាជ ជូនណាត ជាដើម ។

គិតត្រឹមថ្ងៃទី០៦ ខែកញ្ញា ឆ្នាំ២០២៤នេះ រដ្ឋបាលរាជធានីភ្នំពេញ ជំនាញសាធារណការ និងដឹកជញ្ជូនរាជធានីភ្នំពេញ បានបញ្ជាក់ថា ការងារប្រព័ន្ធលូដ៏ធំថ្មី ដ៏មានសារៈសំខាន់ផ្លូវមាត់ទន្លេសួនសម្តេច ហ៊ុន សែន សង្កាត់ទន្លេបាសាក់ ខណ្ឌដូនពេញ បានអនុវត្តន៌តាមផែនការការងារ (សម្រេចបាន៥៥%) ប្រកបដោយសុវត្ថិភាពការដ្ឋាន និងគុណភាពការងារ ។
រដ្ឋបាលរាជធានីភ្នំពេញ មន្ទីរសាធារណការ និងដឹកជញ្ជូនរាជធានីភ្នំពេញ សាលាខណ្ឌចំការមន សំណូមពរដល់ប្រជាពលរដ្ឋ ពេលការដ្ឋានដាក់លូបានកំពុងអនុវត្តន៌ពេលនេះ មេត្តាយោគយល់ក្រុមការងារ ជាពិសេសត្រូវគោរពច្បាប់ចរាចរណ៍ ដើម្បីអោយបងប្អូនធ្វើដំណើបានស្រួល និងសុវត្តិភាពខ្ពស់ ៕