លោកជំទាវវេជ្ជបណ្ឌិត យក់ សម្បត្តិ ផ្ដល់ការណែនាំ៥ចំណុច របស់ឯកឧត្តម សាស្តាចារ្យរដ្ឋមន្ត្រីសុខាភិបាលក្នុងពិធីបើកសន្និបាតការងារដល់កម្មវិធីជាតិប្រយុទ្ធនឹងជំងឺគ្រុនចាញ់

រាជធានីភ្នំពេញ÷ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល  ថ្លែងយ៉ាងដូច្នេះនៅក្នុងឱកាសបើកសន្និបាត បូកសរុបលទ្ធផលការងារឆ្នាំ ២០២៤ និងលើកទិសដៅការងារឆ្នាំ ២០២៥ របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ នៃក្រសួងសុខាភិបាល ក្រោមប្រធានបទ «កម្ពុជាគ្មានជំងឺគ្រុនចាញ់ និងជំងឺព្រូនស៊ីស្កូ ត្រឹមឆ្នាំ២០២៥ ប្រកបដោយនិរន្តរភាព» នៅថ្ងៃទី២៤ ខែមីនា ឆ្នាំ ២០២៥  ព្រឹកមិញនេះ។

លោកជំទាវលើកឡើងថែមថា  ជាការពិតណាស់ ឆ្នាំ២០២៤ ករណីជំងឺគ្រុនចាញ់នៅសល់ ៣៥៥ ករណីឈឺ គ្មានស្លាប់ គ្មាន គ្រុនចាញ់ហ្វាល់ស៊ីប៉ារ៉ូមឆ្លងក្នុងប្រទេស ជំងឺដង្កូវព្រូនធំពោះ ឬស៊ីស្កូនៅសល់តិចតួចក្នុងកម្រិត លែងជាបញ្ហាសុខភាពសារធារណៈ ជំងឺគ្រុនឈាមត្រូវបានកាត់បន្ថយជាង ៤ដង តិចជាងឆ្នាំ ២០២៣ និងបង្ការទប់ស្កាត់មិនឱ្យប្រជាជនឈឺជាង ៥ម៉ឺននាក់ ក៏ដូចជាសមិទ្ធផលគ្រប់គ្រងបង្ការ ជំងឺឆ្លងផ្សេងៗទៀត ប៉ុន្តែយើងត្រូវតែខិតខំបន្តថែមទៀត ធ្វើយ៉ាងណាឱ្យកាន់តែប្រសើរឡើងជាបន្ត បន្ទាប់ទាំងប្រសិទ្ធភាព គុណភាព និងស័ក្តិសិទ្ធភាពដោយខ្លួនយើងផ្ទាល់ត្រូវតែជាម្ចាស់ និងជាអ្នក ដឹកនាំក្នុងការសម្រេចបានជោគជ័យលើរាល់គោលដៅយុទ្ធសាស្ត្រសុខាភិបាល។

ទន្ទឹមនឹងនេះដែរ លោកជំទាវ រដ្ឋលេខាធិការសូមចូលរួមមតិមួយចំនួនជាធាតុចូលដល់អង្គសន្និបាតដើម្បីយកទៅធ្វើជាគតិក្នុងការជជែក ពិភាក្សាគ្នាបន្ថែមទៀត ដើម្បីរកដំណោះស្រាយបញ្ហាប្រឈម និងនវានុវត្តន៍អន្តរាគមន៍ទាន់ពេល វេលា ធានាបាននូវការសម្រេចបេសកកម្ម និងផែនការយុទ្ធសាស្ត្ររបស់កម្មវិធីជាតិស្របតាមផែនការ យុទ្ធសាស្ត្រសុខាភិបាល សម្រាប់ឆ្នាំ២០២៥ និងឆ្នាំបន្ត៖

* មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ៖ ត្រូវបន្តពង្រឹង ភាពជាអ្នកដឹកនាំ ភាពជាម្ចាស់ ប្រកបដោយនវានុវត្តន៍ និងបុរេសកម្ម តាមរយៈ ការធ្វើទំនើប កម្មបច្ចេកវិទ្យា ព័ត៌មានវិទ្យា កិច្ចសហការនិងសហប្រតិបត្តិការជាមួយអ្នកពាក់ព័ន្ធ ដៃគូវិនិ យោគ ឱ្យបានពេញលេញ និងឱ្យអស់ពីលទ្ធភាព។

* កម្មវិធីជាតិប្រយុទ្ធនឹងជំងឺគ្រុនចាញ់៖ លោកជំទាវ សូមពាំនាំនូវ ការណែនាំទាំង ៥ចំណុច របស់ឯក ឧត្តមសាស្ត្រាចារ្យរដ្ឋមន្ត្រី ថ្លែងក្នុងឱកាសសន្និបាតការងារសុខាភិបាលកាលពីថ្ងៃទី ៤ ខែមីនា ឆ្នាំ២០២៥ ៖

1. ត្រូវស្រាវជ្រាវរកឱ្យឃើញរាល់ករណីគ្រុនចាញ់ ហើយព្យាបាលផ្តាច់

2. ត្រូវបន្តធ្វើការបណ្តុះបណ្តាលពីការចម្លងជំងឺ រោគសញ្ញា ការធ្វើរោគវិនិច្ឆ័យ ការព្យាបាល និង ការបង្ការជំងឺគ្រុនចាញ់ ដល់គ្រូពេទ្យ ឬអ្នកពាក់ព័ន្ធនៅតាមសហគមន៍ ឬកងកម្លាំង

3. ត្រូវផ្តល់ថ្នាំបង្ការ នៅគ្រប់តំបន់មានហានិភ័យចម្លងជំងឺគ្រុនចាញ់

4. គ្រប់អង្គភាពទាំងអស់ ត្រូវធានាមិនឱ្យមានការឆ្លងជំងឺគ្រុនចាញ់នៅក្នុងតំបន់គ្រប់គ្រងរបស់ ខ្លួន

5. បង្ការករណីនាំចូលពីអ្នកដំណើរមកពីប្រទេសដែលមានជំងឺគ្រុនចាញ់៖ តាមរយៈការចូលរួម សហការជាមួយក្រុមចត្តាឡីស័ក្កនៅតាមច្រកចេញ-ចូលអន្តរជាតិ

កម្មវិធីជាតិប្រយុទ្ធនឹងជំងឺគ្រុនឈាម៖

បន្តអនុវត្តបុរេសកម្មគ្រប់គ្រងភ្នាក់ងារសត្វមូស និងវិធានការបង្ការសកម្មតាមដានស្ថានភាព មូស និងកម្ចាត់មូស

បន្តពង្រឹង និងពង្រីកការងារបណ្តុះបណ្តាលការធ្វើរោគវិនិច្ឆ័យ គ្រប់គ្រងករណីជំងឺគ្រុនឈាម ព្រមទាំងការបញ្ជូនជំងឺទាន់ពេលវេលាបង្ការការវិវត្តន៍ជំងឺទៅកាន់តែធ្ងន់ធ្ងរ

ធ្វើការប៉ាន់ប្រមាណ និងផ្ទៀងផ្ទាត់ត្រៀមបម្រុង ឱសថ សម្ភារៈ បរិក្ខារ ដើម្បីអន្តរាគមន៍ ឆ្លើយតបបន្ទាន់គ្រប់គ្រងស្ថានភាពជំងឺ ពិសេស ករណីមានការផ្ទុះជំងឺជាយថាហេតុ។

* កម្មវិធីជាតិប្រយុទ្ធនឹងជំងឺដង្កូវព្រូន៖

ត្រូវពង្រឹង និងពង្រីកវិសាលភាពលេបថ្នាំទម្លាក់ព្រូនជាសមូហភាពដល់ប្រជាជនគោលដៅ ឱ្យមានប្រសិទ្ធភាពអត្រាគ្របដណ្តប់ខ្ពស់

ត្រូវអនុវត្តឱ្យបាននូវប្រសិទ្ធភាពសមហរណកម្មសកម្មភាពការងារឆ្ពោះទៅលុបបំបាត់ជំងឺ ព្រូនស៊ីស្កូ ឬ (ជំងឺព្រូនធំពោះ) នៅក្នុងខេត្តក្រចេះ និងស្ទឹងត្រែង ពិសេសត្រូវខិតខំកៀរគរ កិច្ចសហការចូលរួមអនុវត្ត ការលេបថ្នាំសមូហភាព ការប្រើប្រាស់បង្គន់អនាម័យក្នុងសហគមន៍ និងអនាម័យរស់នៅស្អាត៕