លោកជំទាវ ឯកអគ្គរដ្ឋទូតសឹង្ហបុរីប្រចាំកម្ពុជា និងបងប្អូននារីក្រសួងព័ត៌មានចំនួនជាង ២០០នាក់ អញ្ចើញមកភ្លក់រសជាតិក្រឡានថ្មគ្រែ ដែលល្បីប្រចាំខេត្តក្រចេះ

ក្រឡានថ្មគ្រែចាប់ផ្តើមលក់ច្រើនឡើងវិញតាមដងផ្លូវនៅឃុំថ្មគ្រែ បន្ទាប់ពីផ្លូវបានកសាងរួច បងប្អូនជិះកាត់កុំភ្លេចណាសាកល្បងជាមួយក្រឡានបាយដំណើបថ្មគ្រែដ៏មានឱជារសឈ្ងុយឆ្ងាញ់ប្រចាំខេត្តក្រចេះ។

ក្នុងដំណើរធ្វើទស្សនកិច្ចស្វែងយល់ពីសក្តានុពលសំខាន់ៗនៅក្នុងខេត្តក្រចេះ ថ្នាក់ដឹកនាំមន្ត្រីរាជការជាស្ត្រីនៃក្រសួងព័ត៌មាន ជាង២០០នាក់ ដឹកនាំដោយ នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ និងលោកជំទាវ ទុយ សិរីរតនៈ នេត្រ ភក្ត្រា ប្រធានកិត្តិយស សមាគមនារីកម្ពុជាដើម្បីសន្តិភាព និងអភិវឌ្ឍន៍សាខាក្រសួងព័ត៌មាន រួមជាមួយវត្តមាន លោកជំទាវ Teo Lay Cheng ឯកអគ្គរដ្ឋទូតសិង្ហបុរី ប្រចាំកម្ពុជា នៅថ្ងៃទី៩ ខែមីនា ឆ្នាំ២០២៥ បានធ្វើការ ភ្លក់រសជាតិក្រឡានថ្មគ្រែ ដែលល្បីប្រចាំខេត្តក្រចេះ និងណែមស្លឹកចេកធ្វើដោយប្រជាសហគមន៍ថ្មគ្រែរ ស្ថិតក្នុងឃុំថ្មគ្រែ ស្រុកចិត្របុរី ខេត្តក្រចេះ។

លោក រ៉ា ណូ ប្រធានសហគមន៍ក្រឡានថ្មគ្រែ បានជម្រាបជូនថា ការលក់ក្រឡានថ្មរគ្រែនៅក្នុង១ថ្ងៃ ចន្លោះ១.៥តោន ទៅ២តោន សម្រាប់ថ្ងៃធម្មតា។ ដោយឡែកសម្រាប់ថ្ងៃបុណ្យទានផ្សេងៗ គឺកំណើននៃការលក់ក្រឡានចន្លោះពី២តោន ទៅ៣តោន ហើយនៅសហគមន៍មួយនេះក្រៅពីការផលិតក្រឡានគឺមានណែម ដែលមានរសជាតិឆ្ងាញ់ល្បីល្បាញផងដែរ។ លោកបានបន្តថា ការផលិតណែម និងក្រឡានថ្មគ្រែនេះ គឺជាស្នាដៃផ្ទាល់របស់ប្រជាពលរដ្ឋនៅក្នុងសហគមន៍ថ្មគ្រែ ដែលផលិតដោយផ្ទាល់ដៃ បែបលក្ខណៈធម្មជាតិ ក្នុងនោះមានណែមស្លឹកចេក ណែមស្បែកជ្រូក និងប្រភេទណែមត្រី ហើយណែមគឺផលិតពីត្រីធម្មជាតិ ។ លោកប្រធានសហគមន៍ក្រឡានថ្មគ្រែ បានសំដែងនូវការរីករាយ ដោយបង្ហាញអារម្មណ៍ថា អ្វីដែលធ្វើឱ្យដំណើរការលក់ក្រឡាន ណែម និងផលិតផលរបស់ប្រជាពលរដ្ឋសហគមន៍កាន់តែដាច់បានកាន់តែច្រើន គឺដោយមានការយកចិត្តទុកដាក់របស់រាជរដ្ឋាភិបាល ក្រុមការងារគណបក្សចុះមូលដ្ឋានខេត្តក្រចេះ ព្រមទាំងអាជ្ញាធរ ដោយរៀបចំស្ថាបនាផ្លូវថ្នល់បានស្អាត ដើម្បីសម្រួលដល់ការធ្វើដំណើរទៅវិញ ទៅមករបស់ប្រជាពលរដ្ឋ ដែលជាការបានចូលរួមចំណែកយ៉ាងសំខាន់ក្នុងការលើកស្ទួយកម្រិតជីវភាពរស់នៅរបស់ប្រជាពលរដ្ឋ។

តាមការបញ្ជាក់របស់ អាជីវករទទួលលក់ ក្រឡាន ណែម បានឲ្យដឹងថា ក្រឡានថ្មរគ្រែ គឺមានប្រភេទតម្លៃផ្សេងគ្នា ក្រឡានធម្មតាមួយគីឡូតម្លៃ ៧,០០០រៀល ក្រឡានរសជាតិខ្នុរ និងក្រឡានខ្ទិះដូង១គីឡូតម្លៃ ១២,០០០រៀល ហើយណែមស្លឹកចេកមួយចង្កោមតម្លៃ ៥ ០០០រៀល៕