សម្តេចមហារដ្ឋសភាធិការធិបតី ឃួន សុដារី៖ វិទ្យាសាស្រ្ដ បច្ចេកវិទ្យា និងនវានុវត្តន៍ គឺជាកត្តាឈ្នះ-ចាញ់ ដែលកំណត់ឧត្តមភាពនៃការប្រកួតប្រជែងរបស់កម្ពុជា និងការសម្រេចបាន ចក្ខុវិស័យកម្ពុជា ឆ្នាំ២០៥០

សម្តេចមហារដ្ឋសភាធិការធិបតី ឃួន សុដារី បានមានប្រសាសន៍ថា វិទ្យាសាស្ត្រ បច្ចេកវិទ្យា និងនវានុវត្តន៍ បានក្លាយជាកត្តាគន្លឹះ និងជាកត្តា កំណត់ឈ្នះ-ចាញ់ នៃការប្រកួតប្រជែង ក្នុងល្បែងនយោបាយសេដ្ឋកិច្ច និងការសម្រេចបាន នូវចក្ខុវិស័យកម្ពុជា ក្នុងការប្រែក្លាយខ្លួនជាប្រទេសមានប្រាក់ ចំណូលមធ្យមកម្រិតខ្ពស់ក្នុងឆ្នាំ២០៣០ និងបន្តក្លាយជាប្រទេសមាន ចំណូលខ្ពស់ ក្នុងឆ្នាំ២០៥០។ 

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា មានប្រសាសន៍បែបនេះ ក្នុងឱកាស អញ្ជើញជាអធិបតីដ៏ខ្ពង់ខ្ពស់បើកវេទិកាផ្សព្វផ្សាយ ស្ដីពី «វឌ្ឍនភាព នៃវិស័យឧស្សាហកម្ម វិទ្យាសាស្រ្ដ បច្ចេកវិទ្យា និង នវានុវត្តន៍ តាមរយៈការអនុវត្តយុទ្ធសាស្ត្របញ្ចកោណដំណាក់កាលទី ១» នៃរាជរដ្ឋាភិបាលនីតិកាលទី៧ នៃរដ្ឋសភា នៅវិមានរដ្ឋសភា នាព្រឹកថ្ងៃទី២៥ ខែមីនា ឆ្នាំ២០២៥។

សម្តេចមហារដ្ឋសភាធិការធិបតី ឃួន សុដារី បានបញ្ជាក់ថា៖ តួនាទីដ៏សំខាន់របស់វិទ្យាសាស្ត្រ បច្ចេកវិទ្យា និងនវានុវត្តន៍ ជាពិសេសបច្ចេកវិទ្យា ត្រូវបានរាជរដ្ឋាភិបាលនីតិកាលទី៧ ដែលមានសម្តេចមហាបវរធិបតី ហ៊ុន ម៉ាណែត ជាប្រមុខដឹកនាំបន្តពីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រី បានកំណត់ជាអាទិភាពគន្លឹះមួយ ក្នុងចំណោមអាទិភាពគន្លឹះទាំង៥ ក្នុងយុទ្ធសាស្ត្របញ្ចកោណដំណាក់កាលទី១ គឺ«មនុស្ស ផ្លូវ ទឹក ភ្លើង និងបច្ចេកវិទ្យា ជាពិសេសបច្ចេកវិទ្យាឌីជីថល» ដែលត្រូវតែជំរុញ និងសម្រេចឱ្យបាន ដើម្បី កសាងសង្គមជាតិមួយមានកំណើន សមធម៌ ចីរភាព និងសុខដុមរមនា។ ដូច្នេះកាតព្វកិច្ចរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ពិតជាដើរតួនាទីដ៏សំខាន់ ជាមូលដ្ឋានជំរុញដល់ការលើកកម្ពស់ តម្លៃ និងការងារនៅក្នុងសេដ្ឋកិច្ចកម្ពុជាបន្ថែមទៀត។ នៅក្នុងឱកាសនេះ សម្តេចប្រធានរដ្ឋសភា បានកោតសរសើរ និងវាយតម្លៃខ្ពស់ ចំពោះសមិទ្ធផលដ៏ច្រើនអនេក ដែលក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រោមការដឹកនាំរបស់ ឯកឧត្តម ហែម វណ្ណឌី សម្រេចបាន ក្នុងរយៈពេល ១៩ ខែ កន្លងមកនេះ ទាំងលើគោលនយោបាយ ការពង្រឹង ការលើកកម្ពស់សមត្ថភាព និងកែលម្អស្ថាប័ន ដើម្បីត្រៀមខ្លួនរួចជាស្រេច ក្នុងការពង្រឹងនិងពង្រីកមូលដ្ឋាន នៃវិស័យឧស្សាហកម្ម បច្ចេកវិទ្យា និងនវានុវត្តន៍ វិស័យសហគ្រាសធុនតូច និងមធ្យមនិងសិប្បកម្ម ការផ្គត់ផ្គង់ទឹកស្អាត ស្តង់ដារូបនីយកម្ម និងការអភិវឌ្ឍសេដ្ឋកិច្ចក្រៅប្រព័ន្ធជាដើម។សម្តេចមហារដ្ឋសភាធិការធិបតី ឃួន សុដារី បានមានប្រសាសន៍បញ្ជាក់បន្តថា ដើម្បីសម្រេចបានគោលដៅ យុទ្ធសាស្ត្របញ្ចកោណដំណាក់កាលទី១ និង ឆ្ពោះទៅរកចក្ខុវិស័យឆ្នាំ ២០៣០ និងឆ្នាំ ២០៥០ យើងត្រូវរួមដៃគ្នាពង្រឹងវិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដោយមានការចូលរួមពីគ្រប់ភាគីពាក់ព័ន្ធគ្រប់កម្រិត និងគ្រប់វិស័យ។ រដ្ឋសភា កម្ពុជានឹងបន្តតាមដាន និងជំរុញការអនុវត្តច្បាប់ និងគោលនយោបាយ វិទ្យាសាស្ត្រ បច្ចេកវិទ្យា និងនវានុវត្តន៍ ព្រមទាំងគាំទ្រដល់ការពង្រឹងភាព ជាដៃគូ ដើម្បីអនុវត្តគោលនយោបាយដែលបានដាក់ចេញដោយក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នេះ។