សាលាធម្មសភា វត្តពោធិសត្វ ទំហំ ២៧ម x ៣៦ម កម្ពស់ពីរជាន់ចំណាយថវិកាជាង ៨៣ម៉ឺនដុល្លារ បានចាប់ផ្ដើមសាងសង់ ដឹកនាំដោយឯកឧត្តម ហុីង ប៊ុនហៀង និង ឯកឧត្តម ទ្រី ភាព

សាលាធម្មសភា វត្តពោធិសត្វ ដែលមានទំហំទទឹង ២៧ ម៉ែត្រ បណ្តោយ ៣៦ ម៉ែត្រ និងមាន២ជាន់ នៅភូមិតាឡឹក ឃុំត្រពាំងវែង ស្រុកកណ្តាលស្ទឹង ខេត្តកណ្តាលបានចាប់ផ្ដើមសាងសង់។ ពិធីបុណ្យបញ្ចុះបឋមសិលា មានការចូលរួមពីឯកឧត្តម នាយឧត្តមសេនីយ៍ កិត្តិសង្គហបណ្ឌិត ហុីង ប៊ុនហៀង នាយករងខុទ្ទកាល័យសម្តេចធិបតី ហ៊ុន ម៉ាណែត នាយករដ្ឋមន្ត្រី និងឯកឧត្តម លោកអ្នកឧកញ៉ា បណ្ឌិត ទ្រី ភាព ទីប្រឹក្សា បេសកជនពិសេស សម្តេចតេជោ ហ៊ុនសែន។

ក្នុងពិធីនេះ ឯកឧត្តម ហុីង ប៊ុនហៀង បានលើកទឹកចិត្ត និងសូមអរគុណចំពោះព្រះសង្ឃ មន្ត្រីអាជ្ញាធរ លោកគ្រូ អ្នកគ្រូ និងប្រជាពលរដ្ឋ ក្នុងការចូលរួមចំណែកការពារសុខសន្តិភាព សណ្តាប់ធ្នាប់សាធារណៈ និងការអភិវឌ្ឍប្រទេសជាតិ។

បន្ថែមលើនេះ ឯកឧត្តម ក៏បានលើកឡើងពីតម្លៃថ្លៃថ្លារបស់សុខសន្តិភាព និងលើកទឹកចិត្តដល់ប្រជាពលរដ្ឋឲ្យប្រុងប្រយ័ត្នពីព័ត៌មានបំផ្លើស និងល្បិចកលរបស់ក្រុមជ្រុលនិយម ដែលបំណងផ្ដួលរំលំរាជរដ្ឋាភិបាលស្របច្បាប់។
ក្នុងឱកាសនោះ ឯកឧត្តម កិត្តិសង្គហបណ្ឌិត ហ៊ីង ប៊ុនហៀង បានប្រគេនបច្ច័យដល់វត្តពោធិសត្វ សម្រាប់សាងសង់សាលាធម្មសភា មានចំនួន ១ម៉ឺនដុល្លាអាមេរិក ហើយឯកឧត្តម លោកអ្នកឧកញ៉ា ទ្រីភាព បានប្រគេនបច្ច័យ ចំនួន ៣ម៉ឺនដុល្លា និងបាននាំយកអំណោយដ៏ថ្លៃថ្លារបស់សម្ដេចធិបតី និងលោកជំទាវបណ្ឌិត ចែកជូនលោកតា យាយជី ក្រុមប្រឹក្សាឃុំ ស្រុក លោកគ្រូអ្នកគ្រូ និងប្រជាពលរដ្ឋស្រុកកណ្តាលស្ទឹង ព្រមទាំងកងកម្លាំងមានសមត្ថកិច្ចជាច្រើនទៀតផងដែរ។

គម្រោងសាងសង់សាលាធម្មសភានេះ នឹងផ្ដល់ផលប្រយោជន៍យ៉ាងច្រើនដល់សហគមន៍ ដោយជំរុញការផ្សព្វផ្សាយព្រះធម៌ និងការអប់រំប្រជាពលរដ្ឋក្នុងវិស័យព្រះពុទ្ធសាសនា៕