សិប្បកម្មទឹកពិសាដប ម៉ារីយ៉ា ឧបត្ថម្ភកីឡាករចំណុះទូកចំនួន៣ សម្រាប់ការចូលរួមក្នុងព្រះរាជពិធីបុណ្យអុំទូក

សិប្បកម្មទឹកពិសាដប ម៉ារីយ៉ា ដែលមានទីតាំងនៅភូមិបុសខ្នុរ ឃុំបុសខ្នុរ ស្រុកចំការលើ ខេត្ត កំពង់ចាម ដែលបង្កើតឡើងនៅឆ្នាំ២០១៨ ដែលមានលោក យាន សំអាត ជាម្ចាស់អាជីវកម្ម និង មានការទទួលស្គាល់ដោយមន្ទីរឧស្សាហកម្ម វិទ្យាសាស្ត្របច្ចេកវិទ្យា និងនវានុត្តន៍ខេត្តកំពង់ចាម បានជួយឧបត្ថម្ភដល់កីឡាករចំណុះទូកចំនួន៣ នូវទឹកពិសាចំនួន ១០០យួរ ដែលរួមមានទូក ឈ្មោះ សារាយតេជោសែនជ័យ, សារាយមហាបវរធិបតីពិជ័យតេជោ និងទូកឈ្មោះព្រះនេត្រទិព្វហនុមាសែនជ័យ ដែលទូកទាំង ៣នេះទើបតែចូលរួមប្រណាំងកាលពីថ្ងៃទី១៧-១៨ ខែតុលា ឆ្នាំ ២០២៤ នៅខេត្តកណ្តាល ហើយក៏នឹងចូលរួមប្រណាំងនៅក្នុងព្រះពិធីបុណ្យអុំទូកដែលនឹង ប្រព្រឹត្តទៅនៅថ្ងៃទី១៤-១៥-១៦ ខែវិច្ឆិកា ឆ្នាំ២០២៤ នៅខាងមុខព្រះបរមរាជវាំងផងដែរ។

ក្នុងឱកាសនេះ គណៈគ្រប់គ្រងទូកទាំង៣ខាងលើបានថ្លែងអំណរគុណយ៉ាងជ្រាលជ្រៅ ចំពោះសិប្បកម្មទឹកពិសាដប ម៉ារីយ៉ា ដែលមានលោក យាន សំអាត ជាម្ចាស់អាជីវកម្ម ដែលបានរួម ចំណែកក្នុងការឧបត្ថម្ភទឹកពិសា រួមទាំងថវិកាមួយចំនួនដល់បងប្អូនកីឡាករចំណុះទូកទុកសំរាប់ ប្រើប្រាស់ក្នុងឱកាសនៃការចូលរួមក្នុងព្រះពិធីបុណ្យអុំទូកដែលនឹងត្រូវប្រព្រឹត្តទៅរយៈពេល  ៣ថ្ងៃ នាពេលខាងមុខនេះ ដោយបានគូសបញ្ជាក់ថា ការចូលរួមចំណែកពីសប្បុរសជន គឺជារឿងមួយដ៏ ល្អបំផុតដោយមួយផ្នែកបានជួយដោះស្រាយការខ្វះខាត សម្រាប់កីឡាករចំណុះទូក និងមួយផ្នែក ទៀតគឺជាការជួយលើកទឹកចិត្តដល់កីឡាករចំណុះទូកឱ្យមានការខិតខំប្រឹងប្រែងក្នុងការប្រណាំង ហើយអ្វីដែលរឹតតែពិសេសជាងនេះទៅទៀតនោះ គឺការចូលរួមចំណែកដល់ការថែរក្សាទំនៀម ទម្លាប់នៃព្រះរាជពិធីបុណ្យអុំទូក ដែលជាព្រឹត្តិការណ៍ដ៏មានអត្ថន័យយ៉ាងជ្រាលជ្រៅជាទីបំផុតនៅ ក្នុងការរំលឹកឡើងវិញនូវភាពអង់អាចនៃកងចម្បាំងផ្នែកជើងទឹករបស់ខ្មែរកាលពីអតីតកាល ក្នុង ការប្រយុទ្ធជាមួយខ្មាំងសត្រូវជិតខាង ដោយការប្រើប្រាស់ទូកជាមធ្យោបាយ សម្រាប់ការធ្វើសឹកសង្គ្រាមយ៉ាងប៉ិនប្រសព្វជាទីបំផុត។ 

សូមជម្រាបជូនថា សិប្បកម្មពិសាដប ម៉ារីយ៉ា មានទស្សនវិស័យក្លាយជាសិប្បកម្មដែលមានគុណភាពស្តង់ដាទី១  ដោយផ្តល់ជូននូវទឹកពិសាដែលមានគុណភាពស្តង់ដាខ្ពស់សំរាប់ប្រជាជនកម្ពុជាគ្រប់រូប ក្រោមគុណតម្លៃរបស់ខ្លួនមានដូចជា ទំនុកចិត្ត សុចរិតភាព គុណភាពខ្ពស់ អតិថិជនជាអាទិភាពទី១ និងសេវាកម្មរហ័សជូនអតិថិជន ដោយបច្ចុប្បន្នសិប្បកម្មម៉ារីយ៉ាបានផលិតទឹកដបមាន ៤ប្រភេទ ដូចជា ទឹកដបចំណុះ ៣៥០មីលីលីត្រ ទឹកដបចំណុះ ៥០០មីលីលីត្រ និងទឹកដបចំណុះ ១៥០០មីលីលីត្រ ព្រមទាំងទឹកពីដុងចំណុះ ២០លីត្រផងដែរ៕