រាជរដ្ឋាភិបាលកម្ពុជា បាននិងកំពុងខិតខំកសាងនូវហេដ្ឋារចនាសម្ព័ន្ធផ្សេងៗ មានសាលារៀនជាដើម នាពេលបច្ចុប្បន្ននេះ និងការចូលរួមផ្សេងៗ ពីអង្គការដៃគូ និងសប្បុរសជននានា ក្នុងការគាំទ្រផ្ដល់នូវជំនួយនានា បានធ្វើឲ្យកូនៗរបស់ប្រជាពលរដ្ឋរស់នៅក្នុងតំបន់ដាច់ស្រយាល ជាពិសេស នៅក្នុងស្រុកសេសាន ខេត្តស្ទឹងត្រែង បានចូលរៀន មានការកើនឡើងគួរឲ្យកត់សម្គាល់ ពីមួយឆ្នាំទៅមួយឆ្នាំ។
គណៈគ្រប់គ្រងសាលាបឋមសិក្សាស្រែគរ ស្ថិតក្នុងឃុំស្រែគរ ស្រុកសេសាន បានឲ្យដឹងថា សាលាបឋមសិក្សានេះ ស្ថិតនៅក្នុងតំបន់ដាច់ស្រយាលដែលពីមុនសឹងតែគ្មាននូវហេដ្ឋារចនាសម្ព័ន្ធអ្វីនោះទេ ប៉ុន្តែបច្ចុប្បន្ន មានផ្លូវធ្វើដំណើរស្រួល ហើយសិស្សក៏មានអគារសិក្សាច្រើនជាងមុន ធ្វើឲ្យថ្នាក់កើនឡើង១៥ថ្នាក់ និងសិស្សមានរហូតដល់ជិត ៥០០នាក់។ បើធៀបនឹងពេលមុន គឺមានការកើនឡើងច្រើន ដែលនេះបង្ហាញពីគោលនយោបាយដ៏ច្បាស់លាស់របស់រាជរដ្ឋាភិបាល ក្នុងការបណ្ដុះមូលធនមនុស្ស ដើម្បីអនុវត្តសម្រេចឲ្យបាននូវចក្ខុវិស័យឆ្នាំ២០៣០ និងឆ្នាំ២០២៥ ។
លោកបន្តថា ទន្ទឹមនឹងការខិតខំរបស់រាជរដ្ឋាភិបាលនេះ ក៏មានអង្គការ និងសប្បុរសជននានា ក៏បានចូលរួមផងដែរ ជាក់ស្ដែងនាពេលនេះ សប្បុរសជនមកពីប្រទេសចិន ដែលមានឈ្មោះថា បង Family បាននាំយកសំភារៈសិក្សា មកចែកជូនសិស្សានុសិស្ស នៅក្នុងសាលានេះ ដើម្បីចូលរួមគាំទ្រ និងពង្រឹងវិស័យអប់រំនៅកម្ពុជា ហើយក៏ជំរុញលើកទឹកចិត្តសិស្ស ឲ្យខិតខំរៀនសូត្រផងដែរ។
ជាមួយនេះ ដើម្បីឆ្លើយតបនឹងកំណើននៃសិស្ស នៅសាលាបឋមសិក្សាស្រែគរនេះ គណៈគ្រប់គ្រងសាលា បានស្នើដល់រាជរដ្ឋាភិបាល អាជ្ញាធរខេត្តស្ទឹងត្រែង អង្គការដៃគូ និងសប្បុរសជននានា បន្តជួយឧបត្ថម្ភគាំទ្រ សាងសង់នូវអគារសិក្សាបន្ថែម ព្រោះអគារសិក្សានៅទីនោះមួយចំនួន ក៏មានសភាពចាស់ទ្រុឌទ្រោម។
សូមបញ្ជាក់ថា ខណៈនេះការផ្ដល់សំភារៈសិក្សាដល់សិស្សនៅសាលាស្រែគរ គឺជាលើកទី១០ហើយ ដែលក្រុមសប្បុរសជនជាតិចិន ដែលមានឈ្មោះថា បង Family បានចូលរួមផ្ដល់នូវសម្ភារសិក្សាដល់សិស្ស នៅតំបន់ជនបទដាច់ស្រយាល ។បើតាមគម្រោង នឹងធ្វើនៅតាមបណ្តារាជធានី-ខេត្ត ទាំង២៥។
