អគ្គនាយកអត្តសញ្ញាណកម្មជួយសម្រួលដំណើររបស់ម្ដាយពលការិនី ដែលបាត់ខ្លួនក្នុងឧបទ្ទវហេតុរញ្ជួយដីនៅថៃ

នៅថ្ងៃទី២ ខែមេសានេះ ក្រសួងការងារ និងបណ្តុះបណ្តាលវិជ្ជាជីវៈ បានស្នើសុំទៅក្រសួងមហាផ្ទៃ ដើម្បីជួយសម្រួលការធ្វើលិខិតឆ្លងដែនបន្ទាន់ទាំងយប់ ជូនលោកស្រី ហ៊ុត សុភួន ម្ដាយពលការិនីដែលបាត់ខ្លួនក្នុងឧបទ្ទវហេតុរញ្ជួយដីនៅប្រទេសថៃ។

ការសម្រួលនេះធ្វើឡើងដោយ ឧត្តមសេនីយ៍ឯក បណ្ឌិត តុប នេត, អគ្គនាយកអត្តសញ្ញាណកម្ម នៃក្រសួងមហាផ្ទៃ ។

លោកស្រី ហ៊ុត សុភួន នឹងធ្វើដំណើរទៅទីក្រុងបាងកក ដើម្បីយកសំណាក DNA សម្រាប់ផ្ទៀងផ្ទាត់ជាមួយសាកសពដែលរកឃើញនៅក្នុងគំនរបាក់បែក។

សមត្ថកិច្ចនគរបាលអន្តោប្រវេសន៍នៃ អគ្គនាយកដ្ឋានអន្តោប្រវេសន៍ រដ្ឋបាលខេត្តបន្ទាយមានជ័យ ស្ថានឯកអគ្គរាជទូតកម្ពុជាប្រចាំប្រទេសថៃ និង អនុព័ន្ធការងារប្រចាំប្រទេសថៃ បានជួយសម្របសម្រួលដល់សាច់ញាតិពលករឆ្លងដែន ដើម្បីធ្វើដំណើរបានរលូន។