ឯកឧត្តមបណ្ឌិត ខាន់ ខុន អញ្ជើញប្រគល់អណ្ដូងទឹកស្អាត ចំនួន៣អណ្ដូង និងចែកអំណោយចំនួន៦០គ្រួសារ ក្នុងការចូលរួមអនុវត្តគោលនយោបាយជាតិគាំពារសង្គម ឆ្នាំ២០២៤-២០៣៥ របស់ រាជរដ្ឋាភិបាលកម្ពុជា

ឯកឧត្តមបណ្ឌិត ខាន់ ខុន អនុរដ្ឋលេខាធិការក្រសួងធម្មការនិងសាសនានិងជាប្រធានសមាគមគ្រីស្ទបរិស័ទក្នុងសន្តិភាព តំណាងដ៏ខ្ពង់ខ្ពស់ ឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការនិងសាសនា  បានចុះប្រគល់អណ្ដូងទឹកស្អាត ចំនួន៣អណ្ដូង និងចែកអំណោយចំនួន៦០គ្រួសារ សរុបថវិកាអស់ចំនួន ៨៧០០$ នៅមូលដ្ឋានខេត្តសៀមរាប។

ក្នុងពិធីចុះប្រគល់នូវសមិទ្ធផលថ្មី អណ្ដូងស្នប់ជូនប្រជាពលរដ្ឋ និងចែកអំណោយ ឯកឧត្តមបណ្ឌិត ខាន់ ខុន បាននាំក្ដីនឹករលឹកគោរពស្រលាញ់របស់ ឯកឧត្តមបណ្ឌិត ចាយ បូរិន មកកាន់បងប្អូនប្រជាពលរដ្ឋប្រកបដោយភាពរីករាយ និងសាទរ ចំពោះសមិទ្ធផលថ្មីនេះ ឯកឧត្តមបានបន្ថែមទៀតថា ការរួមសាមគ្គីភាពគឺជារឿងចាំបាច់សម្រាប់ប្រជាពលរដ្ឋក្នុងសហគមន៍ ការចេះជួយយកអាសារគ្នា ជួយគ្នា គឺជារឿងសំខាន់សម្រាប់ការរស់នៅប្រកបដោយភាព រីកចម្រើន និងរស់នៅប្រកបដោយសុខដុម មិនប្រកាន់នៃនិន្នាការណាមួយនោះទេ ដោយសង្កត់ធ្ងន់លើ ការចេះចូលរួមជួយគ្នា ដើម្បីឲ្យប្រទេសជាតិមានការរីកចម្រើន ពីព្រោះយើងគឺជាខ្មែរ ខ្មែរត្រូវតែមានការសាមគ្គីភាពជានិច្ច។

ឯកឧត្តមបណ្ឌិត បានមានប្រសាសន៍ថា ក្រោមការដឹកនាំប្រកបដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានផ្ដោតការយកចិត្តទុកដាក់ចំពោះសុខុមាលភាព សុវត្ថិភាព និង ការអភិវឌ្ឍមនុស្ស គឺជាគ្រឹះដ៏សំខាន់ក្នុងការកសាងមូលធនមនុស្សប្រកបដោយសក្តានុពលសម្រាប់ការអភិវឌ្ឍសង្គម  ។ជាមួយនិងការដាក់ចេញនៅយុទ្ធសាស្ត្របញ្ចកោណ-ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និង ចីរភាព និងបានកំណត់យកអាទិភាពគន្លឹះ៥គឺ មនុស្ស, ផ្លូវ, ទឹក, ភ្លើង និងបច្ចេកវិទ្យា» ។

ឯកឧត្តមបណ្ឌិត អនុរដ្ឋលេខាធិការ បានបញ្ជាក់ទៀតថា ដើម្បីសម្រេចបាននូវចក្ខុវិស័យឆ្នាំ២០៥០ ក្លាយជាប្រទេសមានចំណូលខ្ពស់ រាជរដ្ឋាភិបាល បានដាក់ចេញនូវក្របខណ្ឌគោលនយោបាយជាតិគាំពារសង្គម ឆ្នាំ២០២៤-២០៣៥បន្ថែម ដែលជាគោលនយោបាយ មានចក្ខុវិស័យរយៈពេលវែង ក្នុងការផ្ដល់ការគាំពារដល់ពលរដ្ឋគ្រប់រូប ទល់នឹងអសន្តិសុខប្រាក់ចំណូល ក្នុងពេលប្រឈមនឹងហានិភ័យនានា ក្នុងដំណាក់កាលនីមួយៗនៃវដ្ដជីវិត សំដៅលើកកម្ពស់សុខភាព និងសុខុមាលភាព, កាត់បន្ថយភាពក្រីក្រ, វិសមភាពយេនឌ័រ និងវិសមភាពសង្គម ព្រមទាំងពង្រឹងសាមគ្គីភាព ស្ថិរភាព និងសមធម៌ក្នុងសង្គមកម្ពុជា ស្របតាមយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា។

សូមជម្រាបជូនថា សមិទ្ធផលទាំងអស់នេះបានមកពីរការរួមសហការ របស់គ្រីស្ទបរិស័ទក្នុងប្រទេស និងក្រៅប្រទេស បរិច្ចាគចូលរួម ជាការអធិដ្ឋាន និងចូលជា ថវិកា តាមរយៈ ឯកឧត្តម ខាន់ ខុន ក្នុងការចុះជួយដល់ ប្រជាជនតាមសហគមន៍ ដើម្បីជាប្រយោជន៍ ដល់ប្រជាពលរដ្ឋ នៅតាមទីជនបទដែលមិនទាន់មានទឹកស្អាតប្រើប្រាស់ ហើយខ្វះខាតទឹកនៅរដូវប្រាំង អណ្ដូងទឹកទាំងនេះស្ថិតនៅ៖ 

១/ ភូមិតាត្រាវ ឃុំស្វាយចេក ស្រុកអង្គធំ ខេត្តសៀមរាប

២/ ភូមិគោកគ្រើល ឃុំលាងដៃ ស្រុកអង្គធំ ខេត្តសៀមរាប

៣/ ភូមិទី៣ សង្កាត់ចុងឃ្នៀស ក្រុងសៀមរាប ខេត្តសៀមរាប ។

ព្រមទាំងអញ្ជើញចែកអំណោយជាគ្រឿងបរិភោគចំនួន៦០គ្រួសារ ដល់ចាស់ជរា ស្រ្តីមេម៉ាយងាយរងគ្រោះ ទាំងអស់នេះជាការចូលរួមចំណែក ដើម្បីជួយសម្រាល បន្ទុកនៃការរស់នៅរយៈពេលខ្លី ក្នុងនោះមួយគ្រួសារទទួលបាន អង្ករ១០គីឡូ មីមួយកេះ ត្រីខមួយស៊ុង និងទឹកត្រីមួយយួរ៕