ឯកឧត្តមរដ្ឋមន្ត្រី ជា សុមេធី ប្រកាសដាក់ឱ្យអនុវត្តនូវឯកសារ២ បន្ថែមទៀតគឺ ផែនការយុទ្ធសាស្ត្រអភិវឌ្ឍន៍វិស័យសង្គមកិច្ច អតីតយុទ្ធជន និងយុវនីតិសម្បទា ២០២៤-២០២៨ និង ម៉េតាទិន្នន័យនៃសូចនាកររបស់ក្រសួង

ព្រឹកថ្ងៃទី ២៥ ខែមីនា ឆ្នាំ២០២៥ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានប្រកាសដាក់ឲ្យអនុវត្តនូវឯកសារ២ បន្ថែមទៀតគឺ ផែនការយុទ្ធសាស្ត្រអភិវឌ្ឍន៍វិស័យសង្គមកិច្ច អតីតយុទ្ធជន និងយុវនីតិសម្បទា ២០២៤-២០២៨ និង ម៉េតាទិន្នន័យនៃសូចនាកររបស់ក្រសួង នៅទីស្ដីការក្រសួងសង្គមកិច្ច អតីតយុទ្ធជន និងយុវនីតិសម្បទា។ ឯកឧត្តមរដ្ឋមន្ត្រី លើកឡើងនិងប្រកាសដាក់ឲ្យអនុវត្តនូវឯកសារទាំង២នេះ នៅក្នុងឱកាសដែលឯកឧត្តមអញ្ជើញជាអធិបតីក្នុងពិធីបើកសន្និបាតបូកសរុបលទ្ធផលការងារឆ្នាំ ២០២៤ និងទិសដៅអនុវត្តបន្តឆ្នាំ ២០២៥ ។ 

ឯកឧត្តម ជា សុមេធី រដ្ឋមន្ត្រី មានប្រសាសន៍ថា ក្រៅពីលទ្ធផលដែលសម្រេចបានកន្លងមករបស់ក្រសួង ឯកឧត្តមបានឆ្លៀតយកឱកាសនេះប្រកាសដាក់ឲ្យអនុវត្តនូវឯកសារពីបន្ថែមទៀតគឺ ទី១-ផែនការយុទ្ធសាស្ត្រអភិវឌ្ឍន៍វិស័យសង្គមកិច្ច អតីតយុទ្ធជន និង ២០២៤-២០២៨ ដែលជាឯកសារដ៏មានសារៈសំខាន់ជាផែនទីបង្ហាញផ្លូវតម្រង់ទិសអនុវត្តការងារគ្រប់ដល់តួអង្គពាក់ព័ន្ធ

សំដៅបង្កើនប្រសិទ្ធភាព និងស័ក្តិសិទ្ធិភាព។ ផែនការយុទ្ធសាស្ត្រនេះមាន ៧ជំពូក ដែលជំពូកនីមួយៗកំណត់នូវកម្មវត្ថុផ្សេងៗគ្នា ស្របតាម ការណែនាំរបស់ក្រសួងផែនការ និងបានឆ្លើយតបទៅនឹងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិ បាលនីតិកាលទី៧នៃរដ្ឋសភា។ 

ទី២-ម៉េតាទិន្នន័យនៃសូចនាកររបស់ក្រសួង ជាឯកសារដ៏មានសារសំខាន់មួយទៀត ដែលណែនាំដល់អ្នក ផលិតស្ថិតិ មានភាពងាយស្រួលក្នុងការផលិតទិន្នន័យស្ថិតិ បង្កើតសូចនាករមួយប្រកបដោយគុណភាព និង មានលក្ខណៈគ្រប់ជ្រុងជ្រោយ។ 

ឯកឧត្តមរដ្ឋមន្ត្រី សង្ឃឹមជឿជាក់ថា ឯកសារទាំងពីរនេះ នឹងក្លាយជាត្រីវិស័យសម្រាប់គ្រប់ប្រតិបត្តិករ និងតួអង្គពាក់ព័ន្ធ ដែលកំពុងបំពេញបេសកកម្មក្នុងវិស័យសង្គមកិច្ច អតីតយុទ្ធជន និងយុវនីតិសម្បទា សំដៅសម្រេចឱ្យបានគោលដៅ និងចក្ខុវិស័យវែងឆ្ងាយរបស់ក្រសួង។ 

បន្ទាប់ពីការប្រកាសដាក់ឱ្យអនុវត្តជាផ្លូវការនៅថ្ងៃនេះ ក្រុមការងារត្រូវបន្តផ្សព្វផ្សាយ ព្រមទាំងធ្វើការបណ្តុះ បណ្តាលឱ្យបានទូលំទូលាយដល់មន្ត្រីថ្នាក់ជាតិ និងមន្ទីរ ស.អ.យ. រាជធានី ខេត្ត បន្ថែមទៀតតាមកម្មវិធីគ្រោងទុក។ ម្យ៉ាងទៀត ឯកឧត្តមរដ្ឋមន្ត្រី សង្ឃឹមយ៉ាងមុតមាំថា តាមរយៈសន្និបាតរយៈពេល ២ថ្ងៃនេះ យើងនឹងកំណត់បាននូវបញ្ហាប្រឈម ដែលជាមូលដ្ឋានសម្រាប់ចាត់វិធានការ ដោះស្រាយបានទាន់ពេលវេលា និងមានប្រសិទ្ធភាព។