ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី អំពាវនាវដល់ក្រសួង-ស្ថាប័ន និងថ្នាក់ក្រោមជាតិ ត្រូវយកចិត្តទុកដាក់លើកម្មវិធីផ្ដល់ជំនួយសង្គមឲ្យចំគោលដៅនៃគ្រួសារជាជនរងគ្រោះ និងមានជីវភាពខ្វះខាតពិតប្រាកដ

ក្នុងឱកាសអញ្ជើញបិទសន្និបាតបូកសរុបលទ្ធផលការងារឆ្នាំ ២០២៤ និងលើកទិសដៅការងារអនុវត្តបន្តឆ្នាំ ២០២៥ របស់ក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី ២៦ ខែ មីនា ឆ្នាំ ២០២៥ ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានអំពាវនាវដល់ក្រសួងស្ថាប័នពាក់ព័ន្ធ ជាពិសេសរដ្ឋបាលថ្នាក់ក្រោមជាតិគ្រប់លំដាប់ថ្នាក់ ត្រូវបន្តបង្កើនការយកចិត្តទុកដាក់ និងពង្រឹងការអនុវត្តកម្មវិធីជាតិជំនួយសង្គមក្នុងកញ្ចប់គ្រួសារ សំដៅជួយឲ្យចំគោលដៅនៃគ្រួសារជាជនរងគ្រោះ និងមានជីវភាពខ្វះខាតពិតប្រាកដ ។ ជាមួយគ្នានេះ ក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវពង្រឹងការអនុវត្តកម្មវិធីជំនួយសង្គមជាសាច់ប្រាក់ ក្នុងការបណ្ដុះបណ្ដាលវិជ្ជាជីវៈទៅដល់យុវជននៃគ្រួសារដែលមានបណ្ណសមធម៌ និងបណ្ណងាយរងហានិភ័យ បន្ទាប់ពីក្រសួងការងារ និងបណ្ដុះបណ្ដាលវិជ្ជាជីវៈ បានចុះឈ្មោះ ហើយជំរុញការផ្សព្វផ្សាយកម្មវិធីនេះដល់យុវជនមានពិការភាពបានចុះឈ្មោះចូលរៀន សំដៅបង្កឱកាសស្មើគ្នាជូនដល់ពួកគាត់ក្នុងការទទួលបានការអភិវឌ្ឍជំនាញ និងការបង្កើនប្រាក់ចំណូលស្របតាមស្ថានភាព និងកម្រិតជីវភាពរស់នៅប្រចាំថ្ងៃ ។

ឯកឧត្តមបន្តថា ក្រសួងស្ថាប័នពាក់ព័ន្ធ និងអាជ្ញាធរគ្រប់លំដាប់ថ្នាក់ ត្រូវតែត្រៀមលក្ខណៈសម្បត្តិជាមុនក្នុងការអនុវត្តកម្មវិធីកិច្ចគាំពារសង្គម ឆ្លើយតបនឹងគ្រោះមហន្តរាយក្នុងករណីមានគ្រោះអាសន្នជាយថាហេតុណាមួយកើតឡើង ដើម្បីអន្តរាគមន៍ជួយដល់គ្រួសាររងគ្រោះ និងងាយរងហានិភ័យ បានទាន់ពេលវេលា និងមានប្រសិទ្ធភាព ។ បន្ថែមពីនេះ រដ្ឋបាលថ្នាក់ក្រោមជាតិគ្រប់លំដាប់ថ្នាក់ ត្រូវបន្តបង្កើនការយកចិត្តទុកដាក់ និងពង្រឹងការអនុវត្តកម្មវិធីជាតិជំនួយសង្គមក្នុងកញ្ចប់គ្រួសារ សំដៅធានាគាំទ្រផ្នែកជីវភាព និងផ្ដល់ឱកាសដល់ក្រុមគោលដៅ ដែលជាជនងាយរងគ្រោះ អាចស្ថិតលើគន្លងនៃការចាកចេញពីភាពក្រីក្រ ព្រមទាំងពង្រីកវិសាលភាពនៃកម្មវិធីនេះ ឲ្យគ្របដណ្ដប់គ្រប់អ្នកទទួលផលទាំងអស់ ។

ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា មានប្រសាសន៍ថា ក្រសួងកំណត់បាននូវបញ្ហាប្រឈមមួយចំនួនដែលត្រូវបន្តគិតគូរ និងដោះស្រាយតាមរយៈយន្តការដែលមានស្រាប់ ការបង្កើតយន្តការថ្មី ការកសាងលិខិតបទដ្ឋានគតិយុត្តិ សំដៅគាំទ្រដល់ការផ្ដល់សេវាគាំពារសង្គមប្រកបដោយប្រសិទ្ធភាពទាន់ពេលវេលា។ កិច្ចការប្រឈមដែលត្រូវយកចិត្តដាក់បន្ត រួមមាន ដោះស្រាយបញ្ហាជនអនាថា ការងារព្យាបាល និងបន្សាបអ្នកញៀនគ្រឿងញៀន ការងារវិមជ្ឈការ និងវិសហមជ្ឈការ និងការអនុវត្តភារកិច្ចផ្ទេរមុខងារគ្រប់គ្រងសេវាថែទាំកុមារនៅថ្នាក់ក្រោមជាតិ ការងារថែទាំជំនួសចំពោះកុមារ ការងារបណ្ដុះបណ្ដាលកម្លាំងសេវាសង្គម កម្មវិធីជាតិជំនួយសង្គម របបសន្តិសុខសង្គម ការងារសមាគមមនុស្សចាស់ ការងារវិស័យពិការភាព និងការងារអភិបាលកិច្ច ៕

ក្រសួងសង្គមកិច្ច អតីតយុទ្ធជន និងយុវនីតិសម្បទា នឹងបន្តអនុវត្តមុខងារបេសកកម្មរបស់ខ្លួនដោយប្រកាន់ខ្ជាប់នូវឆន្ទៈមោះមុត និងការទទួលខុសត្រូវខ្ពស់ ដើម្បីសម្រេចឲ្យបាននូវសមិទ្ធផលថ្មីៗបន្ថែមទៀត ក្នុងទិសដៅរួមចំណែកដល់ការជំរុញការអភិវឌ្ឍន៍សង្គម និងសេដ្ឋកិច្ច ព្រមទាំងរួមចំណែកអនុវត្តនៃយុទ្ធសាស្ត្របញ្ចកោណដំណាក់កាលទី ១ របស់ទិសដៅកំណត់។