ឯកឧត្តមសាស្ត្រាចារ្យ ឈាង រ៉ា និង ឯកឧត្តម នេត្រ ភក្ត្រា សម្ពោធដាក់ឱ្យប្រើប្រាស់ជាផ្លូវការអគារផ្នែកជំងឺកុមារថ្មី នៅបរិវេណមន្ទីរពេទ្យបង្អែកខេត្តក្រចេះ ជាអំណោយរបស់មជ្ឈមណ្ឌលថែទាំសុខភាពចេនឡា,

(ខេត្តក្រចេះ)៖  អគារផ្នែកជំងឺកុមារថ្មីចំនួន ១អគារ កម្ពស់ ២ជាន់ បណ្តោយប្រវែង ៤០ម៉ែត្រ និងទទឹង ១៤ម៉ែត្រ ស្ថិតនៅក្នុងបរិវេណមន្ទីរពេទ្យបង្អែកខេត្តក្រចេះ ជាអំណោយរបស់មជ្ឈមណ្ឌលថែទាំសុខភាពចេនឡា ត្រូវបានប្រារព្ធពិធីសម្ពោធដាក់ឲ្យប្រើប្រាស់ជាផ្លូវការនៅព្រឹកថ្ងៃទី២០ ខែមីនា ឆ្នាំ២០២៥ ក្រោមអធិបតីភាព

ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និង ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ ។

   អគារផ្នែកជំងឺកុមារថ្មី នៅក្នុងបរិវេណមន្ទីរពេទ្យបង្អែកខេត្តក្រចេះ បានចាប់ផ្តើមសាងសង់កាលពីខែឧសភា ឆ្នាំ២០២៤ និងបានបញ្ចប់ការសាងសង់ជាស្ថាពរនៅដើមខែមករា ឆ្នាំ២០២៥ ដោយបានចំណាយថវិកាសរុប ៩៤៥,៥៦០$ ជាអំណោយដ៏ថ្លៃថ្លារបស់របស់ អង្គការមជ្ឈមណ្ឌល ថែទាំសុខភាពចេនឡា ក្នុងការចូលរួមលើកកម្ពស់សុខមាលភាពរបស់បងប្អូនប្រជាពលរដ្ឋក្នុងមូលដ្ឋានខេត្តក្រចេះ ។

  មណ្ឌលថែទាំសុខភាពកុមារចេនឡា Chenla Children’s Health Care ត្រូវបានបង្កើតឡើងក្នុងឆ្នាំ ២០១៦ ដោយក្រុមការងារមួយក្រុមមានទស្សនៈវិស័យរួមគ្នាមកពីកម្ពុជា កាណាដា អូស្ត្រាលី សិង្ហបុរី អាឡឺម៉ង់ និងប្រទេសមួយចំនួនផ្សេងទៀត។ 

  លោក William Housworth ប្រធានក្រុមប្រឹក្សាភិបាលនិងជានាយកប្រតិបត្តិនៃអង្គការមណ្ឌលថែទាំសុខភាពកុមារចេនឡា បានថ្លែងថា ក្រុមការងារមួយនេះនៅតែជឿជាក់ថា កុមារកម្ពុជា មានសិទ្ធិទទួលបាននូវជីវិតរស់នៅប្រកបដោយសុខភាពល្អ និងសុភមង្គល ទោះបីជាពួកគេស្ថិតនៅក្នុងគ្រួសារក្រីក្រ ឬមាននោះទេ។ ក្រុមការងារនេះបានយល់យ៉ាងច្បាស់អំពីមូលហេតុនៃបញ្ហាប្រឈមជាច្រើន ដែលនាំឱ្យមាន មរណភាពកុមារនៅក្នុងតំបន់ ដូចដែលយើងបានដឹងសព្វថ្ងៃនេះ។

  ប្រធានក្រុមប្រឹក្សាភិបាលនិងជានាយកប្រតិបត្តិនៃមណ្ឌលថែទាំសុខភាពកុមារចេនឡា បានសំដែងនូវសេចក្តីសោមនស្សរីករាយក្នុងកិច្ចសហប្រតិបត្តិការជាមួយរាជរដ្ឋាភិបាលកម្ពុជា ដើម្បីឆ្ពោះទៅរកគោលដៅ នៃការផ្តល់ការថែទាំសង្គ្រោះអាយុជីវិតកុមារគ្រប់រូបនៅក្នុងតំបន់នេះដែលមានតម្រូវការ។ តាមរយៈនេះ Chenla Children’s Health Care ក៏មានបំណងក្នុងការពង្រីកសកម្មភាពរបស់ខ្លួនទៅតាមខេត្តបន្ថែមទៀត ដែលទាមទារនូវកិច្ចខិតខំប្រឹងប្រែង និងសហប្រតិបត្តិការបន្ថែមទៀត ៕