ឯកឧត្តម ជាប ដាវុធ អញ្ជើញជួប សំណេះសំណាល និងអាហារសាមគ្គី សមាជិកសមាគមបុគ្គលិកពន្ធដារកម្ពុជា ដែលចូលនិវត្តន៍
ថ្ងៃទី២៨ ខែមីនា ឆ្នាំ២០២៥ ឯកឧត្តម ជាប ដាវុធ ប្រធានសមាគមបុគ្គលិកពន្ធដារកម្ពុជា បានអញ្ជើញជួបសំណេះសំណាល និងពិសារអាហារសាមគ្គី ជាមួយសមាជិកសមាគមបុគ្គលិកពន្ធដារកម្ពុជា ដែលចូលនិវត្តន៍ប្រមាណ ២៤០ រូប ដែលរៀបចំឡើងនៅ ភោជនីយដ្ឋានទន្លេបាសាក់ រាជធានីភ្នំពេញ ។
ឯកឧត្តម រ័ត្ន មុនី អនុប្រធានសមាគមបុគ្គលិកពន្ធដារកម្ពុជា បានរាយការណ៍ថា ថ្ងៃនេះ សមាគមបុគ្គលិកពន្ធដារកម្ពុជា បានរៀបចំ “ពិធីជួបសំណេះសំណាល និង អាហារសាមគ្គី សមាជិកសមាគមបុគ្គលិកពន្ធដារកម្ពុជា ដែលចូលនិវត្តន៍” ដើម្បីរឹតចំណង មិត្តភាព សាមគ្គីភាពរវាងអតីតមន្ត្រីពន្ធដារ និងមន្ត្រីពន្ធដារបច្ចុប្បន្ន និងដើម្បីអបអរសាទរពិធី បុណ្យចូលឆ្នាំថ្មី ប្រពៃណីជាតិខ្មែរដែលនឹងចូលមកដល់ក្នុងពេលខ្លីខាងមុខនេះ ។
សេចក្តីរាយការណ៍របស់ ឯកឧត្តម រ័ត្ន មុនី អនុប្រធានសមាគមបុគ្គលិកពន្ធដារកម្ពុជា ឆ្នាំ២០២៤ សមាគមបុគ្គលិកពន្ធដារកម្ពុជាសម្រេចបាននូវលទ្ធផលជាបន្តបន្ទាប់ និងបានដំណើរការយ៉ាងរឹងមាំ មានប្រសិទ្ធភាព ស្របតាមលក្ខន្តិកៈថ្មីរបស់សមាគមបុគ្គលិក ពន្ធដារ ចុះថ្ងៃទី ២៦ ខែ ធ្នូ ឆ្នាំ២០២៣ ។
ដើម្បីអាចទ្រទ្រង់ចំណាយក្នុងកិច្ចដំណើរ សមាគមមានប្រភពចំណូលពីប្រាក់វិភាគរបស់សមាជិកសកម្ម សមាជិកកិត្តិយស និងសមាជិកឧបការគុណ ការឧបត្ថម្ភពីសមាជិក អំណោយឬការឧបត្ថម្ភពីសប្បុរជននានា និងប្រភពចំណូលផ្សេងៗ ដូចជាចំណូលពីការជួលអគារ ចំណូលពីការប្រាក់ធនាគារជាដើម។
សរុបចំណូល-ចំណាយសមាគមក្នុងឆ្នាំ២០២៤ រួមមាន ៖ ចំណូលប្រចាំឆ្នាំ២០២៤ ចំនួនជិត ៨១៤លានរៀល និងជាង ១៦ម៉ឺនដុល្លារ ។ រីឯចំណាយប្រចាំឆ្នាំ២០២៤ ចំនួនជាង ៦៥៥លានរៀល និងជា ១៥ម៉ឺនដុល្លារ ។ ហើយសមាគមមានការយកចិត្តទុកដាក់ជាប្រចាំចំពោះជីវភាពរស់នៅរបស់ សមាជិកសមាគមដែលជួបប្រទះនូវការខ្វះខាត, មានជំងឺ ឬគ្រោះថ្នាក់ផ្សេងៗ ជាយថាហេតុ។
បន្ទាប់ពីចំណាប់អារម្មណ៍របស់ ឯកឧត្តម ស៊ឹម អៀង អតីយប្រតិភូរាជរដ្ឋាភិបាល ទទួលបន្ទុកជា អគ្គនាយក នៃអគ្គនាយកដ្ឋានពន្ធដារ តំណាងនិវត្តជនទាំងអស់ រួចមក ឯកឧត្តម ជាប ដាវុធ មានប្រសាសន៍ថា ពិធីជួបជុំនេះ ត្រូវបានរៀបចំឡើងក្នុងគោលបំណង ដើម្បីរក្សាទំនាក់ទនង និងរឹតចំណងមិត្តភាព សាមគ្គីភាព រវាងមន្ត្រីពន្ធដារជំនាន់មុន និងមន្ត្រីពន្ធដារបច្ចុប្បន្ន ប្រកបដោយក្តីរលឹក ភាពកក់ក្តៅ និងការគិតគូរដល់អតីតមន្ត្រីពន្ធដារ ដែលធ្លាប់បម្រើការងារជូន អគ្គនាយកដ្ឋានពន្ធដារ អស់ពីកម្លាំងកាយចិត្ត និងប្រាជ្ញាស្មារតី និងដើម្បីអបអរសាទរ ពិធីបុណ្យចូលឆ្នាំថ្មី ប្រពៃណីជាតិខ្មែរដែលនឹងចូលមកដល់ក្នុងពេលខ្លីខាងមុខនេះ។
ឯកឧត្តម ជាប ដាវុធ បន្តថា សមាគមបុគ្គលិកពន្ធដារកម្ពុជា ត្រូវបានបង្កើតឡើងកាលពីឆ្នាំ២០១០ ក្រោមគំនិតផ្តួចផ្តើមដ៏ពិសិដ្ឋរបស់ ឯកឧត្តមកិត្តិបរិរក្សបណ្ឌិត គាត ឈន់ អតីតឧបនាយករដ្ឋមន្ត្រី រដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុ ជាស្ពានភ្ជាប់ទំនាក់ទំនងរវាងអតីតមន្ត្រីពន្ធដារ និងមន្ត្រីពន្ធដារ បច្ចុប្បន្ន ដើម្បី ទី១ លើកតម្កើងគុណតម្លៃ នៃមិត្តភាព សាមគ្គីភាព របស់មន្ត្រីពន្ធដារ ទី២ ផ្តល់ ការឧបត្ថម្ភគ្នាទៅវិញទៅមក និងទី៣ ជួយឧបត្ថម្ភផ្នែកហិរញ្ញវត្ថុដល់មន្ត្រីពន្ធដារ ដែលជួបការ លំបាក ដោយសារ អគ្គិភ័យឆេះលំនៅដ្ឋាន, មរណភាព, មាតុភាព, ចូលនិវត្តន៍, មានជំងឺ, ជួប គ្រោះអាសន្ន ជាដើម។ គិតមកដល់នេះ មានរយៈពេលជិត ១៥ ឆ្នាំហើយ គឺជិត ៤ អាណត្តិ ដែលរូបខ្ញុំ ទទួលបាននូវការគាំទ្រនិងសេចក្តីទុកចិត្ត ពីសមាជិកសមាជិកាសមាគមទាំងអស់ ដែលបានបោះឆ្នោតជ្រើសតាំងរូបខ្ញុំធ្វើជាប្រធានសមាគមបុគ្គលិកពន្ធដារ តាំងពីខែឧសភា ឆ្នាំ២០១០ រហូតមកដល់បច្ចុប្បន្ននេះ ។
ឯកឧត្តម ជាប ដាវុធ បញ្ជាក់ថា ថ្វីត្បិតតែពិធីជួបជុំថ្ងៃនេះ មិនបានជួបជាមួយនិវត្តជនទាំងអស់ចំនួន ៧៨៤រូប របស់អគ្គនាយកដ្ឋានពន្ធដារ ពិសេសនៅតាមខេត្ត ក៏កន្លងមក ក្នុងនាមជាតំណាងរបស់ខ្ញុំ លោក-លោកស្រីថ្នាក់ដឹកនាំគណៈកម្មាធិការកណ្តាលសមាគម និង ប្រធានសាខា សមាគមបុគ្គលិកពន្ធដារកម្ពុជានៅតាមអង្គភាព និងខេត្ត-ខណ្ឌ បានចុះជួបសំណេះសំណាល ជាមួយនិវត្តជន និងចុះសួរសុខទុក្ខនៅទីកន្លែងដែលនិវត្តជនរស់នៅ ដើម្បីកុំឱ្យពួកគាត់ពិបាក ក្នុងការធ្វើដំណើរ។ក្នុងនាមអគ្គបណ្ឌិតសភាចារ្យឧបនាយករដ្ឋមន្ត្រីអូនព័ន្ធមុនីរ័ត្នរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុឯកឧត្តមគង់វិបុលប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានពន្ធដារឯកឧត្តមជាបដាវុធបានប្រគល់ថវិកាឧបត្ថម្ភក្នុងឱកាសបុណ្យចូលឆ្នាំថ្មីប្រពៃណីជាតិដល់ និវត្តន៍ជនទាំង 784 រូបក្នុងម្នាក់ៗទទួលបានថវិកា 40 ម៉ឺនរៀល។
