ឯកឧត្តម នាយឧត្តមសេនីយ៍ មាស វិរិទ្ធ: ម្ចាស់ក្រុមហ៊ុនត្រូវអនុវត្តកាតព្វកិច្ចនិងការទទួលខុសត្រូវលើសារធាតុគីមីផ្សំ

រាជធានីភ្នំពេញ: ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន ថ្លៃងបែបនេះក្នុងពិធីបិទសិក្ខាសាលាស្តីពីការពង្រឹងប្រសិទ្ធភាពការផ្លាស់ប្តូរព័ត៌មានទាក់ទងនឹងការគ្រប់គ្រងសារធាតុគីមីផ្សំ ជាមួយក្រុមហ៊ុន រោងចក្រ សហគ្រាស នៅថ្ងៃទី២៧ ខែធ្នូ ឆ្នាំ២០២៤ នាទីស្តីការក្រសួងមហាផ្ទៃ។

លោក ស៊ូប៉ាផាត់ ហ៊ីបឱសថ អគ្គទីប្រឹក្សាអមស្ថានទូតថៃប្រចាំកម្ពុជាទទួលបន្ទុកការងារគ្រឿង ញៀនបានថ្លែងអំណរគុណដល់ភាគីកម្ពុជាដែលបានសហការជាមួយភាគីថៃលើការងារប្រយុទ្ធប្រឆាំងគ្រឿងញៀនរួមគ្នាបង្ការទប់ស្កាត់បញ្ហាគ្រឿងញៀនឆ្លងកាត់ព្រំដែននិងត្រួតពិនិត្យសារធាតុគីមី។

ក្នុងនាមឯកឧត្តមសន្តិបណ្ឌិត នេត សាវឿនឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ក្នុងឱកាសនោះ ឯកឧត្តម នាយឧត្តមសេនីយ៍ បានធ្វើការកោតសរសើរ និងវាយតម្លៃខ្ពស់ចំពោះក្រសួង ស្ថាប័ន អង្គភាព និងអ្នកពាក់ព័ន្ធទាំងអស់ ដែលបាននិងកំពុងអនុវត្តនូវតួនាទីភារកិច្ចប្រកបដោយការទទួលខុសត្រូវខ្ពស់លើការងារគ្រប់គ្រងត្រួតពិនិត្យសារធាតុញៀននិងសារធាតុគីមីផ្សំ។

ក្នុងឱកាសនោះដែរ ឯកឧត្តម នាយឧត្តមសេនីយ៍ មាស វិរិទ្ធ បានថ្លែងបន្តថា អនុវត្តតាមអនុសាសន៍របស់សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា អាជ្ញាធរជាតិប្រយុទ្ធប្រឆាំងគ្រឿងញៀនបានដាក់ចេញនូវសេចក្តីណែនាំនិងបទបញ្ជាពាក់ព័ន្ធនានាក្នុងនោះបានបង្កើតនូវក្រុមការងារអន្តរក្រសួងត្រួតពិនិត្យសារធាតុញៀននិងសារធាតុគីមីផ្សំដើម្បីបង្កើនប្រសិទ្ធភាពគ្រប់គ្រងត្រួតពិនិត្យលើការស្នើសុំនាំចេញនាំចូលការដឹកជញ្ជូន ការចែកចាយ ការប្រើប្រាស់ និងការរក្សាទុកសារធាតុញៀននិងសារធាតុគីមីផ្សំសំដៅរួមគ្នាបង្ការទប់ស្កាត់ការលួចបង្វែរពីជំនួញស្របច្បាប់ យកទៅកែច្នៃផលិតគ្រឿងញៀនខុសច្បាប់នៅក្នុងប្រទេសកម្ពុជា។

ជាមួយនេះ នាយឧត្តមសេនីយ៍ មាស វិរិទ្ធ បានណែនាំដល់ម្ចាស់ក្រុមហ៊ុន រោងចក្រ សហគ្រាសពាក់ព័ន្ធទាំងអស់ ត្រូវអនុវត្តកាតព្វកិច្ចទទួលខុសត្រូវស្របតាមនិយាមប្រតិបត្តិ លក្ខណបច្ចេកទេស  :

១.ការស្នើសុំនាំចូល ការគ្រប់គ្រង ការចែកចាយ ប្រើប្រាស់ និងការរក្សាទុកសារធាតុគីមីផ្សំ

២- ត្រូវរៀបចំឱ្យមានអ្នកជំនាញបច្ចេកទេសផែ្នកគីមី សម្រាប់គ្រប់គ្រង និងបញ្ជាការប្រើប្រាស់សម្រាប់ចង្វាក់ផលិតកម្មរបស់ខ្លួន។

៣-ត្រូវមានឃ្លាំងរក្សាទុកសារធាតុគីមីផ្សំឱ្យបានត្រឹមត្រូវតាមលក្ខណៈបច្ចេកទេស និងត្រូវញែកដាច់ដោយឡែកពីគ្នារវាងសារធាតុគីមីផ្សំគ្រឿងញៀន និងសារធាតុគីមីផ្សំទូទៅ។

៤-ត្រូវមានការកត់ត្រាច្បាស់លាស់ពីបរិមាណនាំចូល ប្រើប្រាស់ និងសន្និធិសារធាតុគីមីផ្សំដើម្បីងាយស្រួលធ្វើការត្រួតពិនិត្យ និងផ្ទៀងផ្ទាត់។

៥-ត្រូវមានរបាយការណ៍ប្រចាំខែ ត្រីមាស ឆមាស និងឆ្នាំ អំពីការទិញលក់ និងការប្រើប្រាស់សារធាតុគីមីផ្សំ ផ្ញើមកលេខាធិការដ្ឋាននៃ ក្រុមការងារអន្តរក្រសួងត្រួតពិនិត្យសារធាតុញៀននិងសារធាតុគីមីផ្សំ និងក្រសួង ស្ថាប័នជំនាញពាក់ព័ន្ធ។

៦- ត្រូវចូលរួមសហការ និងផ្លាស់ប្តូរព័ត៌មានជាប្រចាំជាមួយស្ថាប័ន អង្គភាពអនុវត្តច្បាប់ អំពីការនាំចូល ការដឹកជញ្ជូន ការចែកចាយ និងការប្រើប្រាស់សារធាតុគីមីផ្សំរបស់ក្រុមហ៊ុន រោងចក្រ សហគ្រាស។