ឯកឧត្តម នេត្រ ភក្ត្រា ជំរុញដល់មន្ទីរព័ត៌មានខេត្តមណ្ឌលគិរី បន្តផ្សព្វផ្សាយព័ត៌មានឱ្យបានទូលំទូលាយដល់ ពលរដ្ឋឱ្យយល់ដឹងកាន់តែច្បាស់នូវព័ត៌មានពិត ត្រឹមត្រូវ ប្រកបដោយវិជ្ជាជីវៈ និងគោលនយោបាយរបស់រដ្ឋាភិបាល

ឯកឧត្តម នេត្រ ភក្ត្រា បានជំរុញដល់មន្ទីរព័ត៌មានខេត្តមណ្ឌលគិរី ត្រូវបន្តខិតខំប្រឹងប្រែងផ្សព្វផ្សាយឱ្យបានទូលំទូលាយបន្ថែមទៀតដើម្បីឱ្យប្រជាពលរដ្ឋកាន់តែយល់ច្បាស់នូវព័ត៌មានពិត ត្រឹមត្រូវ ប្រកបដោយវិជ្ជាជីវៈ និងយល់ដឹងពីគោលនយោបាយរបស់រាជរដ្ឋាភិបាល ព្រមទាំងការអភិវឌ្ឍរីកចម្រើនរបស់ប្រទេសជាតិ។ 

ឯកឧត្តម នេត្រ ភក្ត្រា​ រដ្ឋមន្ត្រីក្រសួងព័ត៌មាន​​ បានមានប្រសាសន៍បែបនេះ ក្នុងពិធីជួបសំណេះសំណាលជាមួយមន្ត្រីរាជការ មន្ត្រីជាប់កិច្ចសន្យា នៃមន្ទីរព័ត៌មានខេត្តមណ្ឌលគិរី និងអ្នកសារព័ត៌មានជាច្រើនរូប នៅមន្ទីរព័ត៌មានខេត្តមណ្ឌលគិរី នារសៀលម្សិលមិញនេះ។

ឯកឧត្តម នេត្រ ភក្ត្រា មានប្រសាសន៍ថា វិស័យព័ត៌មានបានដើរតួនាទីយ៉ាងសំខាន់ក្នុងការផ្តល់ដំណឹងចែកជូនដល់គ្រប់មជ្ឈដ្ឋាន។មិនត្រឹមប៉ុណ្ណោះស្ថាប័នព័ត៌មានជាតិ អន្តរជាតិ ទាំងរដ្ឋនិងឯកជនគឺជាប្រព័ន្ឋផ្សព្វផ្សាយដ៏ចាំបាច់សម្រាប់នាំយកនូវសកម្មភាពកិច្ចការងាររបស់រាជរដ្ឋាភិបាលបង្ហាញជូនសាធារណៈជន។ ឯកឧត្តម​​ រដ្ឋមន្ត្រី នេត្រ ភក្ត្រា បានគូសបញ្ជាក់ថា ក្រសួងព័ត៌មាន មិនមែនគ្រាន់តែជាក្រសួងប្រមូល និងផ្សព្វផ្សាយព័ត៌មាននោះទេ ហើយមន្ទីរព័ត៌មាន ក៏មិនមែនត្រឹមតែទៅយកព័ត៌មាន ហើយផ្សាយព័ត៌មាននោះដែរ ប៉ុន្តែត្រូវតែចេះគិតពីយុទ្ធសាស្រ្ត និងគោលនយោបាយព័ត៌មាន សម្រាប់ប្រទេសជាតិ។ ឯកឧត្តម នេត្រ ភក្ត្រា បានកោតសរសើរ និងវាយតម្លៃខ្ពស់ចំពោះលទ្ធផលការងារទាំងឡាយដែលមន្ទីរព័ត៌មានខេត្តមណ្ឌលគិរី អនុវត្តន៍បាននាពេលកន្លងមក ទោះបីជួបការលំបាកខ្វះខាតក្តី តែបានប្រឹងប្រែងរួមគ្នាជំនះបំពេញការងារសម្រេចជូនជាតិ និងខេត្តរបស់ខ្លួន ដែលបង្ហាញពីការលះបង់គ្រប់បែបយ៉ាងដើម្បីវិស័យព័ត៌មាន និងសោតទស្សន៍ ក្នុងខេត្តឱ្យមានការរីកចម្រើន។

ឯកឧត្តម រដ្ឋមន្រ្តី បានថ្លែងអំណរគុណបងប្អូនមន្ត្រីរាជការ មន្ត្រីជាប់កិច្ចសន្យា នៃមន្ទីរព័ត៌មានខេត្តមណ្ឌលគិរី ដែលបានយកអស់កម្លាំងកាយចិត្ត បញ្ហា ស្មារតីក្នុងការបំពេញតួនាទីភារកិច្ចរបស់ខ្លួនប្រកបដោយការទទួលខុសត្រូវ និងវិជ្ជាជីវៈ ព្រមទាំងជំរុញឱ្យបង្កើនសមត្ថភាពបន្ថែម តាមរយៈការបង្កើតវគ្គបណ្តុះបណ្តាលពង្រឹងសមត្ថភាពជាប្រចាំ និងចូលរួមអនុវត្តឱ្យបានជោគជ័យលើការងារកំណែទម្រង់រដ្ឋបាលសាធារណៈដែលរាជរដ្ឋាភិបាលបានដាក់ចុះ និងក្រសួងស្ថាប័នក្នុងនោះក៏មានក្រសួងព័ត៌មានដែលបាននិងកំពុងអនុវត្តយ៉ាងសកម្មលើការងារកំណែទម្រង់រដ្ឋបាលសាធារណៈដើម្បីបង្កើនប្រសិទ្ធភាពស្ថាប័ន ប្រសិទ្ធផល និងគុណភាពការងារ។

នាឱកាសនោះដែរឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានផ្តល់ប័ណ្ណសសើរចែកជូនមន្ត្រីរាជការ និងមន្ត្រីជាប់កិច្ចសន្យាដែលមានស្នាដៃបំពេញកិច្ចការងារនាពេលកន្លងមក៕