ឯកឧត្តម រដ្ឋមន្ត្រី នេត្រ ភក្ត្រា និងលោកជំទាវ រួមជាមួយថ្នាក់ដឹកមន្ត្រីរាជការជាស្ត្រីក្នុងវិស័យព័ត៌មានជាង ២០០នាក់ អញ្ជើញប្រគេនទេយ្យទាន និងបច្ច័យដល់ព្រះសង្ឃគង់នៅវត្តវិហារធំសរសរ១០០ ខេត្តក្រចេះ

ឯកឧត្តម នេត្រ ភក្រ្តា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ និងលោកជំទាវ ទុយ សិរីរតនៈ នេត្រ ភក្ត្រា ប្រធានកិត្តិយស សមាគមនារីកម្ពុជាដើម្បីសន្តិភាព និងអភិវឌ្ឍន៍សាខាក្រសួងព័ត៌មាន រួមជាមួយ ថ្នាក់ដឹកនាំ មន្ត្រីរាជការជាស្ត្រីក្នុងវិស័យព័ត៌មានប្រមាណជាង ជាង២០០នាក់ បានអញ្ជើញនាំទេយ្យទាន ទេយ្យវត្ថុ និងបច្ច័យវេរប្រគេនដល់ព្រះសង្ឃគង់នៅទីអាតាមវត្តវិហារធំសរសរ១០០ ស្ថិតនៅឃុំសំបូរ ស្រុកសំបូរ ខេត្តក្រចេះ នាព្រឹកថ្ងៃទី៩ ខែមីនា ឆ្នាំ២០២៥។ នៅក្នុងឱកាសនេះដែរ ក៏មានការញ្ជើញចូលរួមពីលោកជំទាវ Teo Lay Cheng ឯកអគ្គរដ្ឋទូតសិង្ហបុរី ប្រចាំកម្ពុជាផងដែរ។

ក្នុងឱកាសអញ្ជើញថ្វាយបង្គំព្រះពុទ្ធរូប និងព្រះង្ឃ ក្នុងវត្តវិហារធំសសរ១០០ ឯកឧត្តម រដ្ឋមន្ត្រី នេត្រ ភក្ត្រា មានប្រសាសន៍លើកឡើងនូវការផ្តាំផ្ញើសាកសួរសុខទុក្ខ នឹករលឹកពីសំណាក់សម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន និងពីសំណាក់សម្តេចធិបតីនាយករដ្ឋមន្ត្រី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រគេនដល់ដល់ព្រះសង្ឃ និងជូនដល់តាជី យាយជី នៅក្នុងទីអារាមវត្តវិហារធំសរសរ១០០ និងជូនដល់បងប្អូនប្រជាពលរដ្ឋក្នុងស្រុកសំបូរ ខេត្តក្រចេះ ហើយក៏បានជម្រាបជូនដែរថា រាជរដ្ឋាភិបាល ក្រោមការដឹកនាំរបស់សម្តេចធិបតី ហ៊ុន ម៉ាណែត បន្តវេនពីសម្តេចតេជោ បានបន្តខិតខំប្រឹងប្រែងក្នុងការកសាងអភិវឌ្ឍន៍សេដ្ឋកិច្ចជាតិឱ្យបានរឹងមាំង និងមានការរីកចម្រើនបន្ថែមទៀត ពិសេសការអភិវឌ្ឍលើគ្រប់វិស័យទាំងវិស័យពុទ្ធចក្រ និងអាណាចក្រ កាន់តែល្អប្រសើរ ។ ទន្ទឹមនេះបានខិតខំទាក់ទងអ្នកវិនិយោគគិនបរទេសមកបណ្តាក់ទុននៅកម្ពុជាកាន់តែច្រើនដើម្បីជាប្រយោជន៍ជាតិ និងលើកកម្ពស់ជីវភាពរស់នៅដល់ប្រជាពលរដ្ឋបានកាន់តែធូរធារប្រសើរឡើង ។ ឯកឧត្តម ប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ បានជម្រាបជូនថា ក្នុងរយៈពេល ២៦ឆ្នាំនៃសន្តិភាពពេញលេញ កម្ពុជាបានបង្កលក្ខណៈងាយស្រួលក្នុងការអភិវឌ្ឍជាតិ សន្តិភាព សម្រាប់មនុស្សគ្រប់រូប ដូច្នេះហើយសូមបងប្អូនប្រជាពលរដ្ឋទាំងអស់បន្តរួមគ្នាថែរក្សាសន្តិភាពនេះឱ្យស្ថិតនៅគង់វង្សជារៀងរហូត ។ការរក្សាបាននូវសុខសន្តិភាពនេះ គឺការសម្រេចចិត្តដ៏ត្រឹមត្រូវបំផុតដោយការជឿទុកចិត្ត មានក្តីសង្ឃឹម និងផ្តល់ទំនុកចិត្តលើគណបក្សប្រជាជនកម្ពុជា ហើយបាននឹងកំពុងដឹកនាំរាជរដ្ឋាភិបាលកម្ពុជា មានតែគណបក្សប្រជាជនកម្ពុជាមួយប៉ុណ្ណោះ បានរំដោះប្រទេសជាតិ និងប្រជាជនកម្ពុជាឲ្យបានរួចផុតពីរបបប្រល័យពូជសាសន៍ ហើយបានប្រឹងប្រែងស្ថារ និងកសាងជាតិ មាតុភូមិ ព្រមទាំងបង្កើនការងារ និងប្រាក់ចំណូល ច្រើនជូនដល់ប្រជាពលរដ្ឋ ដើម្បីលើកស្ទួយជីវភាពរស់នៅប្រចាំថ្ងៃបានកាន់តែល្អប្រសើរ។

ឯកឧត្តម នេត្រ ភក្ត្រា បានលើកឡើងពីសមិទ្ធផលជាច្រើនដែលរាជរដ្ឋាភិបាលកម្ពុជាសម្រេចបានក្រោមការដឹកនាំរបស់គណបក្សប្រជាជនកម្ពុជា ដោយបានផ្តល់ជូនដល់ប្រជាពលរដ្ឋខេត្តក្រចេះ រួមមានការអភិវឌ្ឍហេដ្ឋារចនាសម្ព័ន្ធ ស្ពានឆ្លងកាត់ ទន្លេមេគង្គខេត្តក្រចេះ ផ្លូវថ្នល់ ៤ខ្សែ ដែលជាការកែប្រែមុខមាត់ខេត្តក្រចេះកាន់មានសោភណភាព ដើម្បីទាក់ទាញភ្ញៀវទេចរជាតិ និងអន្តរជាតិមកទស្សនាលេងកំសាន្តកាន់តែច្រើនឡើងជាលំដាប់។ មានផ្លូវ មានស្ពាន មានសង្ឃឹម និងពោរពេញដោយការអភិវឌ្ឍ ត្រឹមខែមករា ឆ្នាំ២០២៥នេះ ស្ពានឆ្លងកាត់ទន្លេមេគង្គ មានប្រវែង ១,៧៦១ម៉ែត្រ បាននឹងកំពុងកសាង គ្រោងដាក់ឱ្យឆ្លងបណ្តោះអាសន្ននាចុងឆ្នាំ២០២៥នេះ។ ជាមួយគ្នានេះការដ្ឋានសាងសង់ផ្លូវ៤ កន្លែងទៀត ក្នុងក្រុងក្រចេះ និងផ្លូវទៅស្រុកសំបូរ នឹងឈានទៅបញ្ចប់ក្នុងពេលឆាប់ៗខាងមុខនេះផងដែរ។ នៅក្នុងឱកាសនេះដែរ ឯកឧត្តម រដ្ឋមន្ត្រី នេត្រ ភក្ត្រា បានអំពាវនាវចំពោះព្រះសង្ឃ និងប្រជាពលរដ្ឋក្នុងស្រុកសំបូរនិយាយដោយឡែក និងនិយាយជារួមនៅទូទាំងខេត្តក្រចេះ សូមបន្តការចូលរួមជាមួយរាជរដ្ឋាភិបាល ក្នុងការថែរក្សាសុខសន្តិភាព សុវត្ថិភាពសាធារណៈ និងដំណើរ ការអភិវឌ្ឍសង្គមជាតិឱ្យកាន់តែសំបូររុងរឿង ក្នុងសុខសន្តិភាពដ៏រឹងមាំ។

បងប្អនប្រជាពលរដ្ឋ និងព្រះសង្ឃ ក្នុងខេត្តក្រចេះ សូមអរគុណសន្តិភាព, សូមគោរពអរគុណសម្តេចតេជោ ហ៊ុន សែន បិតាស្ថាបនិកសន្តិភាពនៅកម្ពុជា, សូមគោរពអរគុណសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ៕

ទេយ្យទានដែល ឯកឧត្តម ប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ និងលោកជំទាវ ព្រមទាំងថ្នាក់ដឹកនាំ មន្ត្រីរាជការជាស្រ្តីនៃក្រសួងព័ត៌មាន នាំយកមកប្រគេនដល់ព្រះសង្ឃគង់នៅវត្តវិហារធំសរសរ១០០ រួមមានភេសជ្ជៈ មីជាតិ ទឹកត្រី អង្ករ ត្រីខកំប៉ុង ទឹកសុទ្ធ និងបច្ច័យកសាងផងដែរ៕