ឯកឧត្តម រដ្ឋមន្ត្រី នេត្រ ភក្រ្តា ៖ ការចូលរួមអភិរក្សសត្វផ្សោត ពីប្រជាពលរដ្ឋ និងប្រជានេសាទ គឺជាការគាំទ្រដល់ទេសចរណ៍ធម្មជាតិនៅមូលដ្ឋានដើម្បីបង្កើនប្រាក់ចំណូលដល់សហគមន៍

ក្នុងដំណើរកម្សាន្តធ្វើទស្សនកិច្ច និងទស្សនាសត្វផ្សោតនៅខេត្តក្រចេះ សម្របសម្រួលដោយ សមាគមនារីកម្ពុជាដើម្បីសន្តិភាព និងអភិវឌ្ឍន៍សាខាក្រសួងព័ត៌មាន ដើម្បីអបអរសាទរទិវាអន្តរជាតិ ៨មីនា នៅថ្ងៃទី៩ ខែមីនា ឆ្នាំ២០២៥ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ បានអំពាវនាវដល់បងប្អូនប្រជាពលរដ្ឋ អាជ្ញាធរមូលដ្ឋានចូលរួមការពារ និងអភិរក្សសត្វផ្សោតនៅតាមដងទន្លេមេគង្គ ដើម្បីអភិរក្សជីវៈចម្រុះដ៏សម្បូណ៌បែប នៃទន្លេមេគង្គឱ្យបានគង់វង្ស និងផ្តល់ផលប្រយោជន៍ជូនសហគមន៍មូលដ្ឋានតាមរយៈការលើកកម្ពស់ទេសចរណ៍ធម្មជាតិ បង្កើនចំណូលជូនដល់ប្រជាពលរដ្ឋមូលដ្ឋាន។

អញ្ជើញជិះទូកទស្សនា សត្វផ្សោត នៅអន្លង់សត្វផ្សោតព្រែកកាំពី ស្ថិតក្នុងស្រុកចិត្របុរី ខេត្តក្រចេះ នាឱកាសនេះ រួមមាន លោកជំទាវ ទុយ សិរីរតនៈ នេត្រ ភក្ត្រា ប្រធានកិត្តិយស សមាគមនារីកម្ពុជាដើម្បីសន្តិភាព និងអភិវឌ្ឍន៍សាខាក្រសួងព័ត៌មាន លោកជំទាវ Teo Lay Cheng ឯកអគ្គរដ្ឋទូតសិង្ហបុរី ប្រចាំកម្ពុជា ព្រមទាំង លោកជំទាវ អស់លោក លោកស្រី ជាថ្នាក់ដឹកនាំ សមាជិក សមាជិកា សមាគមនារី ក្រសួងព័ត៌មាន ។

នៅឱកាសនោះ ឯកឧត្តមរដ្ឋមន្ត្រី នេត្រ ភក្ត្រា បានជម្រាបជូនថា សត្វផ្សោតជាសម្បត្តិធម្មជាតិដ៏មានតម្លៃសម្រាប់កម្ពុជា និងសម្រាប់ជីវៈចម្រុះពិភពលោក។ បច្ចុប្បន្ននេះ សត្វផ្សោតនៅកម្ពុជាមានចំនួនប្រមាណជាង ១០០ក្បាល ដែលរស់នៅទន្លេមេគង្គ ក្នុងភូមិសាស្ត្រខេត្តក្រចេះ និងខេត្តស្ទឹងត្រែង ។ នៅតំបន់អភិរក្សព្រែកកាំពី ក្នុងស្រុកចិត្របុរី ខេត្តក្រចេះ ជាកន្លែងទេសចរណ៍សត្វផ្សោតដ៏សំខាន់ ហើយមួយថ្ងៃៗ មានភ្ញៀវទេសចរជាតិ និងអន្តរជាតិ អញ្ជើញមកទស្សនាកម្សាន្ត សប្បាយ ហើយផ្តល់នូវការងារ និងចំណូលជូនដល់សហគមន៍មូលដ្ឋានផងដែរ ។

ឯកឧត្តមរដ្ឋមន្ត្រី បានគូសបញ្ជាក់ថា ចំពោះការដឹកនាំមន្ត្រីរាជការជាស្ត្រក្នុងក្រសួងព័ត៌មាន អញ្ជើញមកទស្សនកិច្ចនៅខេត្តក្រចេះ និងជិះទូកទស្សនាសត្វផ្សោត គឺដើម្បីឱ្យបងប្អូនបានឃើញ បានស្គាល់សត្វផ្សោតដែលជាបេតិកភណ្ឌធម្មជាតិរបស់កម្ពុជា ដោយផ្ទាល់ភ្នែក និងពញាក់ស្មារតីឱ្យបន្តរួមគ្នាថែរក្សា អភិរក្ស ការពារធនធានធម្មជាតិដ៏កម្រមួយនេះបានគង់វង្ស ហើយកាន់តែមានចំនួនច្រើនបន្ថែមទៀត ។ ទន្ទឹមនេះដែរ ឯកឧត្តម ក៏បានជម្រាបជូនដែរថា ខេត្តក្រចេះ មានទីតាំងទេសចរណ៍ប្រកបដោយសក្តានុពលជាច្រើនដូចជា៖ អន្លង់សត្វផ្សោតព្រែកកាំពី ស្ថិតក្នុងស្រុកចិត្របុរី, រមណីយដ្ឋានឆ្នេរខ្សាច់ វត្ដវិហារធំសសរ១០០ ដែលស្ថិតនៅក្នុងស្រុកសំបូរ ខេត្តក្រចេះ, តំបន់សហគមន៍ទេសចរណ៍សហគមន៍កោះទ្រង់ ក្នុងក្រុងក្រចេះ, រមណីយដ្ឋានទឹកជួរទន្លេមេគង្គកាំពី។ ជាមួយគ្នានេះ ខេត្តក្រចេះក៏មាននូវផលិតផលសំខាន់ៗទាក់ទាញភ្ញៀវទេសចរផងដែរដូចជាក្រឡានថ្មគ្រែ, ក្រូចថ្លុងកោះទ្រង់ ប៉ិកួៈនៅស្រុកឆ្លូង និងមុខម្ហូបពីត្រីនៃទន្លេមេគង្គផងដែរ។

ឯកឧត្តមប្រធានក្រុមការងារ ក៏បានវាយតម្លៃខ្ពស់ និងកោតសរសើរដល់អាជ្ញាធរដែនដីខេត្តក្រចេះ មន្ទីរទេសចរណ៍ គណៈកម្មការគ្រប់គ្រងរមណីយដ្ឋាន និងសហគមន៍ទេសចរណ៍ ដែលបានចូលរួមរៀបចំពង្រឹងការធ្វេីបដិសណ្ឋារកិច្ចភ្ញៀវទេសចរជាតិ អន្តរជាតិ បានល្អប្រសេីរ ហើយសេវាកម្មក៏ល្អ រក្សាអនាម័យក្នុង ពិសេសសុខសុវត្ថិភាពជូនភ្ញៀវបានល្អប្រសើរ៕