ឯកឧត្តម រដ្ឋមន្ត្រី នេត្រ ភក្រ្តា ៖ ក្រសួងព័ត៌មាន នឹងធ្វើការចែកអាវកាក់សារព័ត៌មាន ដែលមានដាក់អក្សរ Press សម្រាប់អ្នកសារព័ត៌មានដែលកំពុងបំពេញតួនាទីនៅក្នុងប្រទេសកម្ពុជាសម្រាប់ប្រើប្រាស់ក្នុងពេលចាំបាច់

អាវកាក់សារព័ត៌មានចំនួន ៣ ៣០០អាវដែលទើបទទួលបានពីអង្គការយូណេស្កូប្រចាំកម្ពុជា ត្រូវបាន ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ប្រកាសដល់អ្នកសារព័ត៌មាន មកបំពេញព័ត៌មានមួយចំនួននៅក្រសួងព័ត៌មាន ដើម្បីក្រុមការងារកត់ត្រាទុក ហើយធ្វើការជូនដំណឹងទាក់ទងនឹងកាល បរិច្ឆទដែលត្រូវមកបើកអាវនៅពេកខាងមុខ ។

   អាវកាក់សារព័ត៌មាននេះ ត្រូវបានលោក Sardar Umar Alam តំណាងអង្គការ UNESCO ប្រចាំនៅកម្ពុជា បានយកមកប្រគល់ជូនដល់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងឱកាសជំនួបពិភាក្សាការងារគ្នានាព្រឹកថ្ងៃទី២៤ ខែមីនា ឆ្នាំ២០២៥ នៅទីស្តីការក្រសួងព័ត៌មាន ។

  ឯកឧត្តម រដ្ឋមន្ត្រី នេត្រ ភក្ត្រា បានគូសបញ្ជាក់ថា អាវកាក់ដែលមានដាក់អក្សរ Press សារព័ត៌មានចំនួន ៣ ៣០០អាវ របស់អង្គការ UNESCO ប្រចាំនៅកម្ពុជា ផ្តល់ដល់ក្រសួងព័ត៌មាននាឱកាសនេះ គឺទុកសម្រាប់ផ្តល់ជូនដល់អ្នកសារព័ត៌មានពាក់ពេលចុះយកព័ត៌មាន ដើម្បីអាចសម្គាល់បានថា ជាអ្នកសារព័ត៌មាន បង្ហាញក្នុងក្របខ័ណ្ឌសាធារណៈ រក្សាបាននូវសុវត្ថិភាព ។ ឯកឧត្តម រដ្ឋមន្ត្រីក្រសួងព័ត៌មាន បានសំដែងនូវការអរគុណដល់ អង្គការ UNESCO ប្រចាំនៅកម្ពុជា ដែលបានផ្តល់អាវកាក់ទាំងនេះ សម្រាប់ធ្វើការចែកទៅដល់អ្នកសារព័ត៌មាន ដើម្បីគាំទ្រដល់កិច្ចការងារផ្សព្វផ្សាយប្រកបដោយ សុវត្ថិភាព និងវិជ្ជាជីវៈ។ ការអនុវត្តក្រមសីលធម៌វិជ្ជាជីវៈសារព័ត៌មានបានត្រឹមត្រូវគឺជាអាវក្រោះការពារអ្នកសារព័ត៌មាន និងធ្វើឱ្យវិស័យសារព័ត៌មានកាន់តែមានការរីកចម្រើន ៕