ឯកឧត្តម សំហេង បុរស ថ្លែងថា សិក្ខាសាលាស្តីពីអាថ៌កំបាំងធ្វើឱ្យអាយុវែងមិនត្រឹមតែសម្រាប់ការថែទាំសុខភាពនៅកម្ពុជាប៉ុណ្ណោះទេ តែក៏ជាកិច្ចសហប្រតិបត្តិការរវាងកម្ពុជា និងចិន លើវិស័យវេជ្ជសាស្ត្រផងដែរ

ឯកឧត្តម សំហេង បុរស រដ្ឋមន្ត្រីប្រតិភូអមនាយករដ្ឋមន្តី ថ្លែងថា សិក្ខាសាលាស្តីពីអាថ៌កំបាំងធ្វើឱ្យអាយុវែងនាថ្ងៃនេះ មិនត្រឹមតែជាការបើកទំព័រថ្មីមួយសម្រាប់ការថែទាំសុខភាពនៅកម្ពុជាប៉ុណ្ណោះទេ តែមានក៏ជាកិច្ចសហប្រតិបត្តិការរវាងកម្ពុជា និងចិន លើវិស័យវេជ្ជសាស្ត្រផងដែរ។ ឯកឧត្តមមានប្រសាសន៍បែបនេះ នៅក្នុងកម្មវិធីសិក្ខាសាលាស្តីពីអាថ៌កំបាំងធ្វើឱ្យអាយុវែង ដែលរៀបចំឡើងដោយមន្ទីរពេទ្យ Superior Med នៅអគារ Morgan Tower ទីក្រុងកោះពេជ្រ ដោយមានវត្តមានចូលរួមពីក្រុមគ្រូពេទ្យមកពីប្រទេសចិន និងនៅកម្ពុជា។

ឯកឧត្តម សំហេង បុរស បន្តថា លោកវេជ្ជបណ្ឌិត Dale Li ជាអ្នកជំនាញផ្នែកវេជ្ជសាស្ត្រដ៏ល្បីល្បាញ ជាគ្រូពេទ្យឯកទេសប្រព័ន្ធប្រសាទ និងជាអ្នកស្រាវជ្រាវវេជ្ជសាស្ត្រពីសាកលវិទ្យាល័យ Cambridge បង្កើតនូវឱថស និងវិធីសាស្ត្រក្នុងការធ្វើឱ្យមនុស្សមានអាយុវែង ដែលបានចំណាយពេលវេលាយ៉ាងមមារញឹក និងមានតម្លៃ ដើម្បីធ្វើបទបង្ហាញនាថ្ងៃនេះ។ លោកវេជ្ជបណ្ឌិត Dale Li បានមើលឃើញពីសក្តានុពលរបស់កម្ពុជា និងបានកំណត់កម្ពុជាជាទិសដៅក្នុងការបង្កើតមន្ទីរពេទ្យនៅកម្ពុជា ដែលជាផ្នែកមួយរបស់មន្ទីរពេទ្យ Superior Med នៅទីក្រុងឆឹងទូ ប្រទេសចិន និង មន្ទីរពេទ្យ King’s Hospital នៅទីក្រុងឌូបៃ នៃប្រទេសអារ៉ាបរួម។ 

ឯកឧត្តមបន្ថែមថា សម្រាប់មន្ទីរពេទ្យដែលនឹងលេចរូបរាងនៅកម្ពុជាក្នុងរយៈពេលដ៏ខ្លីខាងមុខនេះ វាមិនត្រឹមតែជាកន្លែងសម្រាប់ព្យាបាលជំងឺប៉ុណ្ណោះទេ ប៉ុន្តែវាថែមទាំងជាកន្លែងសម្រាប់បង្ការជំងឺ ការពន្យាអាយុជីវិត ការព្យាបាល ឬផ្សំកោសិកា ។ មិនតែប៉ុណ្ណោះមន្ទីរពេទ្យនេះក៏នឹងក្លាយជាកម្លាំងចលករក្នុងការទាក់ទាញភ្ញៀវទេសចរណ៍អន្តរជាតិឱ្យមកកម្ពុជា ដើម្បីទទួលបាននូវការព្យាបាល និងថែទាំសុខភាព ក្រៅពីការដំណើរកម្សាន្តនៅតាមរមណីដ្ឋាន ប្រវត្តិសាស្ត្រ និងធម្មជាតិដ៏សម្បូរបែបរបស់កម្ពុជា។ ឯកឧត្តម បញ្ជាក់ថា ប្រជាជាតិមួយអាចប្រសើរទៅបាន គឺមិនអាស្រ័យតែលើការអភិវឌ្ឍប្រព័ន្ធហេដ្ឋារចនាសម្ព័ន្ធ ផ្លូវ អគារ តែមួយប៉ុណ្ណោះនោះទេ គឺចាំបាច់ត្រូវយកចិត្តទុកដាក់អំពីសុខមាលភាពរបស់ប្រជាជន ព្រោះបើប្រជាជនមានសុខភាពល្អ នោះផលិតភាពនឹងកើនឡើងដែលនាំឱ្យមានកំណើនសេដ្ឋកិច្ច ហើយប្រជាជននឹងរស់នៅដោយភាពសប្បាយរីករាយជាមួយនឹងស្នាមញញឹម។