ឯកឧត្តម ហ៊ុន ម៉ានី៖ ចូលរួមរំលែកទុក្ខ និងអំពាវនាវឱ្យប្រជាពលរដ្ឋប្រុងប្រយ័ត្នចំពោះគ្រោះមហន្តរាយធម្មជាតិរញ្ជួយដី

ឯកឧត្តម ហ៊ុន ម៉ានី បានសម្ដែងការសោកស្តាយ និងរំលែកទុក្ខជាមួយថ្នាក់ដឹកនាំ និងប្រជាជនរបស់ប្រទេសទាំងពីរ សាធារណរដ្ឋសហភាពមីយ៉ាន់ម៉ា និងព្រះរាជាណាចក្រថៃ ចំពោះគ្រោះមហន្តរាយធម្មជាតិរញ្ជួយដីយ៉ាងខ្លាំង បណ្ដាលឱ្យមានការខូចខាតធ្ងន់ធ្ងរ កាលពីទី២៨ ខែមីនា ឆ្នាំ២០២៥។

ឯកឧត្តមបានបញ្ជាក់ថា ក្រោយគ្រោះមហន្តរាយនេះ មានការខូចខាតយ៉ាងខ្លាំងដល់ហេដ្ឋារចនាសម្ព័ន្ធ ទ្រព្យសម្បត្តិ និងអាយុជីវិត។ ឯកឧត្តមក៏បានបួងសួងឱ្យកិច្ចការជួយសង្គ្រោះអ្នកដែលកំពុងរងរបួស និងបាត់ខ្លួនទទួលបានជោគជ័យ។

ក្នុងក្របខ័ណ្ឌនៃការជួយសង្គ្រោះនេះ ឯកឧត្តមបានកោតសរសើរ និងវាយតម្លៃខ្ពស់ចំពោះស្ថានឯកអគ្គរាជទូតកម្ពុជា ប្រចាំនៅព្រះរាជាណាចក្រថៃ និងអាជ្ញាធរកម្ពុជាពាក់ព័ន្ធ ដែលបានជ្រោមជ្រែង និងសម្របសម្រួលការជួយសង្គ្រោះប្រជាពលរដ្ឋខ្មែរដែលស្ថិតនៅក្នុងតំបន់គ្រោះថ្នាក់នោះ។

ជាមួយគ្នានេះ ឯកឧត្តមក៏បានអំពាវនាវដល់បងប្អូនប្រជាពលរដ្ឋដែលកំពុងរស់នៅ និងបំពេញកិច្ចការនៅតំបន់ហានិភ័យទាំងអស់ឱ្យបង្កើនការប្រុងប្រយ័ត្នខ្ពស់ និងរក្សាសុខសុវត្ថិភាព។