🇰🇭 បងប្អូនខ្មែររស់នៅក្រៅប្រទេស បំពេញដំណើរទស្សនកិច្ចតំបន់ព្រំដែនកម្ពុជា-វៀតណាម ដើម្បីបានឃើញដោយផ្ទាល់ និងការស្ដាប់ព័ត៌មានពីសមត្ថកិច្ចជំនាញ

🇰🇭 បងប្អូនខ្មែររស់នៅក្រៅប្រទេស បំពេញដំណើរទស្សនកិច្ចតំបន់ព្រំដែនកម្ពុជា-វៀតណាម ដើម្បីបានឃើញដោយផ្ទាល់ និងការស្ដាប់ព័ត៌មានពីសមត្ថកិច្ចជំនាញ 

បន្ទាប់ពីបំពេញដំណើរទស្សនកិច្ចនៅ គោលដៅទី១ និងទី២ រួចមក បងប្អូនសហគមន៍ខ្មែរពីប្រទេសអូស្ត្រាលី និងណូវែលហ្សេឡង់ បានមកដល់ គោលដៅទី៣ ដែលជាគោលដៅចុងក្រោយ នៃដំណើរទស្សនកិច្ចតំបន់ព្រំដែនកម្ពុជា-វៀតណាម។ គោលដៅទី៣នេះស្ថិតនៅបង្គោលព្រំដែនលេខ ៦៥/១០ (១,២) និងបង្គោលលេខ ៦៥ (១,២,៣) ក្នុងខេត្តមណ្ឌលគិរី។

ដំណើរទស្សនកិច្ចនេះ ដឹកនាំដោយ លោក សារ៉ា ណារីជេស៉ិន, តំណាងសហគមន៍ខ្មែររស់នៅប្រទេសអូស្ត្រាលី និងណូវែលហ្សេឡង់។ នៅទីនោះ បងប្អូនបានទទួលការស្វាគមន៍យ៉ាងកក់ក្តៅពី លោក ហ៊ាញ ប៊ុណ្ណា អភិបាលរងខេត្តមណ្ឌលគិរី និងអាជ្ញាធរមូលដ្ឋានគ្រប់លំដាប់ថ្នាក់។

ការសិក្សាអំពីព្រំដែន អ្នកជំនាញបច្ចេកទេសកិច្ចការព្រំដែនបានធ្វើបទបង្ហាញស្តីអំពី ដំណើរការកំណត់ព្រំដែន, ការគ្រប់គ្រង និងការការពារបូរណទឹកដីសុវណ្ណភូមិអច្ឆរយៈ។ តាមរយៈបទបង្ហាញនេះ បងប្អូនខ្មែរបានឃើញដោយផ្ទាល់ភ្នែកពីភាពត្រឹមត្រូវ និងភាពរឹងមាំនៃខ្សែបន្ទាត់ព្រំដែន ដែលបានកំណត់យ៉ាងច្បាស់លាស់។

ការមកឃើញដោយផ្ទាល់ និងការស្ដាប់ព័ត៌មានពីសមត្ថកិច្ចជំនាញ បានផ្តល់ ទំនុកចិត្តដ៏ខ្លាំងពីបងប្អូនខ្មែររស់នៅក្រៅប្រទេស។ បងប្អូនសហគមន៍ខ្មែរបានលើកឡើងថា “ព្រំដែនរបស់កម្ពុជាមានភាពរឹងមាំ, ច្បាស់លាស់ និងមិនមានប្រទេសណាអាចឈ្លានពានយកបានសូម្បីតែមីលីមែត្រណាឡើយ”។

បន្ទាប់ពីបំពេញ ដំណើរទស្សនកិច្ចតាមខ្សែបន្ទាត់ព្រំដែន ក្នុងខេត្តត្បូងឃ្មុំ, ក្រចេះ និងមណ្ឌលគិរីរួចមក គណៈប្រតិភូបានបន្តទស្សនានៅទំនប់អូតេធិបតី ឋិតក្នុងស្រុក អូរាំង ខេត្តមណ្ឌលគិរី។

ទំនប់អូតេធិបតី មិនត្រឹមតែបម្រើផលប្រយោជន៍ក្នុងវិស័យកសិកម្មប៉ុណ្ណោះទេ ប៉ុន្តែបន្ថែមលើនេះ គម្រោងនេះក៏បានបំពេញតួនាទីជាស្នូលសម្រាប់ការរីកចម្រើនសេដ្ឋកិច្ច ការអភិរក្សធនធានទឹក ទាក់ទាញវិស័យទេសចរណ៍ និងការលើកកម្ពស់ជីវភាពប្រជាពលរដ្ឋ។

ក្នុងឱកាសនោះ បងប្អូនសហគមន៍ខ្មែរបានឃើញដោយផ្ទាល់ពី ទិដ្ឋភាពដ៏អស្ចារ្យនៃទំនប់ និងសមិទ្ធផលជាតិដែលបង្ហាញពីការអភិវឌ្ឍរបស់ប្រទេស។

ដំណើរទស្សនកិច្ចមកកាន់តំបន់ភូមិភាគឦសាន នាពេលនេះ មិនត្រឹមតែជាការចូលមកទស្សនាអំពីការគ្រប់គ្រងព្រំដែនប៉ុណ្ណោះទេ ប៉ុន្តែជាការសម្ដែងឆន្ទៈរបស់បងប្អូនខ្មែររស់នៅក្រៅប្រទេស ក្នុងការគាំទ្រកិច្ចការការពារទឹកដីជាតិ និងអភិវឌ្ឍប្រទេស។

“ស្រឡាញ់ជាតិ មិនមែនត្រឹមតែក្នុងចិត្ត ប៉ុន្តែត្រូវចូលរួមដោយផ្ទាល់ដើម្បីអភិរក្សនិងអភិវឌ្ឍន៍សមិទ្ធផល និងធ្វើឲ្យប្រទេសកម្ពុជាកាន់តែរឹងមាំ ក្រោមម្លប់សន្តិភាព”។