ប្រធានក្រុមអ្នកនាំពាក្យ គ.ជ.ប៖ ការធ្វើបច្ចុប្បន្នភាពទិន្នន័យជីវមាឌ គ្រោងប្រព្រឹត្តទៅដោយផ្ទាល់ជាមួយនឹងប្រជាពលរដ្ឋ ចាប់ពីថ្ងៃទី ០១ ដល់ថ្ងៃទី ២៦ ខែឧសភា ឆ្នាំ ២០២៥

ការធ្វើបច្ចុប្បន្នភាពទិន្នន័យជីវមាឌ គ្រោងប្រព្រឹត្តទៅដោយផ្ទាល់ជាមួយនឹងប្រជាពលរដ្ឋ ចាប់ពីថ្ងៃទី ០១ ដល់ថ្ងៃទី ២៦ ខែឧសភា ឆ្នាំ ២០២៥ នេះបើតាមការលើកឡើងរបស់ ឯកឧត្តម ហង្ស ពុទ្ធា សមាជិក គ.ជ.ប និងជាប្រធានក្រុមអ្នកនាំពាក្យ គ.ជ.ប ។ ឯកឧត្តម បានលើកឡើងបែបនេះ និងប្រាប់ក្រុមអ្នកសារព័ត៌មាន ក្រោយពីបញ្ចប់វគ្គអប់រំ ផ្សព្វផ្សាយ និងបញ្ជ្រាបការយល់ដឹងស្តីពី «សារៈសំខាន់នៃការបោះឆ្នោតនៅកម្ពុជា» ជូនដល់ប្រធានលេខាធិការដ្ឋានរាជធានី ខេត្តរៀបចំការបោះឆ្នោត (លធ.ខប) ទាំង ២៥ និងនិស្សិត មកពីគ្រឹះស្ថានសិក្សានានាក្នុងរាជធានីភ្នំពេញ ក្រោមអធិបតីភាព ឯកឧត្តម ប្រាជ្ញ ចន្ទ ប្រធាន គ.ជ.ប នៅវិទ្យាស្ថានបច្ចេកវិទ្យាកម្ពុជា (សាលាតិចណូ) រាជធានីភ្នំពេញ។ 

នៅក្នុងវគ្គអប់រំផ្សព្វផ្សាយនិងបញ្ជ្រាបការយល់ដឹងស្ដីពីសារៈសំខាន់នេះ គឺក្នុងគោលបំណងដើម្បីផ្សព្វផ្សាយ និងបញ្ជ្រាបអំពីសារៈសំខាន់នៃការបោះឆ្នោតនៅកម្ពុជា និងសារៈសំខាន់នៃដំណាក់កាលទាំង៤ ទាំងការពិនិត្យបញ្ជី ចុះឈ្មោះបោះឆ្នោត ការបោះឆ្នោត ព្រមទាំងសកម្មភាពទាំងឡាយណាទាក់ទងទៅនឹងការបោះឆ្នោតផងដែរ ។ 

ក្រោយពីបញ្ចប់វគ្គអប់រំ ផ្សព្វផ្សាយ និងបញ្ជ្រាបការយល់ដឹងស្តីពី «សារៈសំខាន់នៃការបោះឆ្នោតនៅកម្ពុជា» ឯកឧត្តម ហង្ស ពុទ្ធា សមាជិក គ.ជ.ប និងជាប្រធានក្រុមអ្នកនាំពាក្យ គ.ជ.ប បាទមានប្រសាសន៍ ប្រាប់ក្រុមអ្នកយកព័ត៌មានថា ÷ អ្វីដែលជាចំណុចថ្មីនៅថ្ងៃនេះ មិនត្រឹមតែការពិនិត្យបញ្ជីឈ្មោះ និងចុះឈ្មោះបោះឆ្នោតប្រចាំឆ្នាំ ២០២៥ ប៉ុណ្ណោះទេ គជប គឺមានភារកិច្ចធ្វើបច្ចុប្បន្នភាពទិន្នន័យជីវមាឌ ដែលជាកត្តាចាំបាច់ ដើម្បីកំណត់អត្តសញ្ញាណពិតនាពេលបច្ចុប្បន្ន ផ្តោតសំខាន់លើគុណភាព ប្រសិទ្ធភាពខ្ពស់ ស្របតាមស្តង់ដា គាំទ្រទៅដល់ដំណើរការនៃការបោះឆ្នោត ។ ការធ្វើបច្ចុប្បន្នភាពទិន្នន័យជីវមាឌ និងប្រព្រឹត្តទៅផ្ទាល់ជាមួយនឹងប្រជាពលរដ្ឋ ចាប់ពីថ្ងៃទី ០១ ដល់ថ្ងៃទី ២៦ ខែឧសភា ឆ្នាំ ២០២៥ ។