លោកជំទាវឯកអគ្គរដ្ឋទូតគុយបា នឹងរៀបចំសហការផលិតវីដេអូឯកសារជាមួយទូរទស្សន៍ជាតិកម្ពុជា (ទទក) ស្តីពី «ខួបលើកទី៦៥នៃទំនាក់ទំងការទូតរវាងកម្ពុជា-គុយបា»

នៅព្រឹកថ្ងៃទី៣១ ខែមីនា ឆ្នាំ២០២៥ ឯកឧត្តម ឃឹម វុទ្ធី អគ្គនាយកនៃអគ្គនាយកដ្ឋានទូរទស្សន៍ជាតិកម្ពុជា បានអញ្ជើញជួបសម្តែងការគួរសម និងពិភាក្សាការងារជាមួយលោកជំទាវ Milena Caridad Zaldivar Piedra ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋគុយបាប្រចាំព្រះរាជាណាចក្រកម្ពុជា។

ជាកិច្ចចាប់ផ្តើម លោកជំទាវ ឯកអគ្គរដ្ឋទូតគុយបាប្រចាំកម្ពុជា បានមានប្រសាសន៍អំពីទំនាក់ទំនងយ៉ាងជិតស្អិតរវាងគុយបា-កម្ពុជា ខណៈឆ្នាំ២០២៥នេះ ជាឆ្នាំដែលកម្ពុជា-គុយបា អបអរសាទរខួប៦៥ឆ្នាំនៃទំនាក់ទំនងការទូតគុយបា-កម្ពុជា ដើម្បីបន្តការថែរក្សាពង្រឹង និងពង្រីកនូវទំនាក់ទំនងនៃចំណងមេត្រីភាពរវាងប្រជាជាតិនៃប្រទេសយើងទាំងពីរកម្ពុជា-គុយបា ឲ្យមានការរីកចម្រើនគង់វង្ស។

លោកជំទាវ បានមានប្រសាសន៍អំពីគំនិតផ្តួចផ្តើមក្នុងការធ្វើកិច្ចសហប្រតិបត្តិការជាមួយអគ្គនាយកដ្ឋានទូរទស្សន៍ជាតិកម្ពុជា ក្នុងការផលិតវីដេអូឯកសារ និងផ្សព្វផ្សាយនៅលើប្រព័ន្ធផ្សព្វផ្សាយរបស់ទូរទស្សន៍ជាតិ ដើម្បីឲ្យសាធារណជនបានស្គាល់កាន់តែស៊ីជម្រៅអំពីទំនាក់ទំនងរវាងគុយបា-កម្ពុជា ជាពិសេសផ្តល់ចំណេះដឹងដល់យុវជនជំនាន់ក្រោយឲ្យបានស្គាល់អំពីទំនាក់ទំនងរវាងប្រទេសទាំងពីរ និងក្នុងឱកាសអបអរសាទរខួបលើកទី៦៥នៃទំនាក់ទំនងការទូតគុយបា-កម្ពុជា។

ជាការឆ្លើយតប ឯកឧត្តម ឃឹម វុទ្ធី បានស្វាគមន៍យ៉ាងរាក់ទាក់កក់ក្តៅចំពោះលោកជំទាវឯកអគ្គរដ្ឋទូតគុយបា ដែលអញ្ជើញមកពិភាក្សាការងារពាក់ព័ន្ធទៅនឹងកិច្ចសហប្រតិបត្តិការរវាងប្រទេសទាំងពីរ និងប្រព័ន្ធផ្សព្វផ្សាយនៅកម្ពុជា។

ឯកឧត្តម អគ្គនាយកក៏បានមានប្រសាសន៍គាំទ្រ ចំពោះគំនិតនៃការបង្កើតកិច្ចសហប្រតិបត្តិការក្នុងការផលិតវីដេអូឯកសាររវាងកម្ពុជា-គុយបា ដើម្បីអបអរសាទរទំនាក់ទំនងការទូតរវាងប្រទេសយើងទាំង២ ក្នុងរយៈពេល៦៥ឆ្នាំកន្លងមកនេះ។

ក្រៅពីនោះ ឯកឧត្តមអគ្គនាយក បានមានប្រសាសន៍អំពីការផ្លាស់ប្តូរទស្សនកិច្ចការងាររវាងអ្នកសារព័ត៌មានវ័យក្មេងកម្ពុជា-គុយបា ដែលមានមជ្ឈមណ្ឌលអន្តរជាតិរបស់គុយបាទទួលបន្ទុកកិច្ចការអន្តរជាតិ ដើម្បីផ្លាស់ប្តូរ និងផលិតឯកសារសំខាន់ៗនានា រវាងប្រទេសទាំង២ ដើម្បីផ្សព្វផ្សាយឲ្យបានកាន់តែទូលំទូលាយអំពីវប្បធម៌ អរិយធម៌ និងតំបន់ទេសចរណ៍រវាងប្រទេសទាំង២កម្ពុជា-គុយបា។

ក្នុងឱកាសជំនួបនេះ ភាគីទាំងពីរបានលើកឡើងអំពីការបង្កើតកិច្ចសហប្រតិបត្តិការនៃការចុះអនុស្សារណៈនៃការយោគយល់គ្នារវាងកម្ពុជា-គុយបា ជាពិសេសរវាងអគ្គនាយកដ្ឋានទូរទស្សន៍ជាតិកម្ពុជា និងទូរទស្សន៍ជាតិនៃសាធារណរដ្ឋគុយបា។

ពាក់ព័ន្ធនឹងអនុស្សារណៈនៃការយោគយល់នេះ ឯកឧត្តមអគ្គនាយក នឹងជម្រាបរាយការណ៍ជូនឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ដើម្បីពង្រឹងបន្ថែមទៀតនូវទំនាក់ទំនងមិត្តភាពទៅវិញទៅមក និងធ្វើឲ្យប្រព័ន្ធផ្សព្វផ្សាយរវាងប្រទេសទាំងពីរកាន់តែជិតស្និត៕