លោក Trump ព្យាករណ៍ថា៖ អាម៉េរិក-ចិន នឹងល្អប្រសើរឡើងវិញ ទោះបីជាកិច្ចប្រជុំពិភពលោកភាគច្រើនលើកឡើងពីវិធានការពន្ធគយជាច្បាប់ព្រៃក្តី

លោកប្រធានាធិបតី Donald Trump បានបន្តវិនិច្ឆ័យថា សហរដ្ឋអាមេរិក និងចិននឹងឈានដល់កិច្ចព្រមព្រៀងពាណិជ្ជកម្ម “យុត្តិធម៌ ឬ ស្មើភាពគ្នា” នៅប៉ុន្មានសប្តាហ៍ខាងមុខនេះ ដោយនេះគឺជាអ្វីដែលលោកប្រាប់អ្នកសារព័ត៌មាននៅក្នុងការិយាល័យ Oval បន្ថែមថា “យើងនឹងចុះសម្រុងគ្នាជាមួយប្រទេសចិនឲ្យបានឆាប់” ។ លោក Trump បាននិយាយនៅក្នុងការិយាល័យ Oval Office ថា “នៅទីបញ្ចប់ ខ្ញុំគិតថាអ្វីដែលនឹងកើតឡើង គឺយើងនឹងមានកិច្ចព្រមព្រៀងដ៏អស្ចារ្យ” ។ ការអត្ថាធិប្បាយរបស់ Trump បានធ្វើឡើងមួយថ្ងៃបន្ទាប់ពីលោកបាននិយាយថាគលោកនឹងមិន “លេងបាល់រឹង ឬ Play Hard ball” ជាមួយប្រទេសចិនទេហើយថាពន្ធគយរបស់គាត់នឹងធ្លាក់ចុះមកវិញ ក្នុងកម្រិតច្រើនដែរ ។ ប៉ុន្តែលោកបានបញ្ជាក់ជាថ្មីថា សហរដ្ឋអាមេរិកនឹង «កំណត់ពន្ធ» ប្រសិនបើចិនមិនធ្វើកិច្ចព្រមព្រៀងជាមួយអាម៉េរិក។ ទន្ទឹមនឹងនោះ ដែរ ប្រទេសចិនបានជំទាស់នឹងសង្គ្រាមពន្ធដាររបស់លោក Trump និងគោលនយោបាយអាមេរិកដំបូងទៅកាន់អង្គការសហប្រជាជាតិ ដោយសួរថាតើពិភពលោកគួរតែតស៊ូមតិសម្រាប់ប្រទេសទាំងអស់ឱ្យធ្វើការជាមួយគ្នា ឬ “ត្រលប់ទៅច្បាប់ព្រៃដែលវាពិតជាព្រៃខ្លាំងណាស់លើអ្នកទន់ខ្សោយ ឬ ប្រទេសទន់ខ្សោយ” ។ ការអំពាវនាវរបស់ឯកអគ្គរដ្ឋទូតចិនលោក Fu Cong សម្រាប់ប្រជាជាតិនានា គឺគាំទ្រពហុភាគីនិយម ដែលជាមូលដ្ឋានគ្រឹះនៃអង្គការសហប្រជាជាតិ ទទួលបានការគាំទ្រយ៉ាងច្រើនលើសលប់នៅក្នុងកិច្ចប្រជុំក្រៅផ្លូវការនៃក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធ លើកលែងតែសហរដ្ឋអាមេរិក។ លោកប្រធានាធិបតីក៏បានប្រាប់អ្នកសារព័ត៌មាននៅក្នុងការិយាល័យ Oval ថាលោកនឹងជួបជាមួយមេដឹកនាំបរទេសមួយចំនួននៅពេលដែលលោកធ្វើដំណើរទៅកាន់ទីក្រុងរ៉ូមសម្រាប់ពិធីបុណ្យសពរបស់សម្តេចប៉ាប Francis នៅចុងសប្តាហ៍នេះ។ លោក Trump បាននិយាយថាលោកនឹងមាន “កិច្ចប្រជុំជាច្រើនដែលបានបង្កើតឡើង” ប៉ុន្តែលោកបានបដិសេធមិនបញ្ចេញឈ្មោះមេដឹកនាំណាមួយឡើយ ហើយលោកនឹងគេចពីសំណួរដដែលៗអំពីថាតើលោកនឹងជួបជាមួយប្រធានាធិបតីអ៊ុយក្រែនលោក Volodymyr Zelenskyy នៅពេលនៅទីនោះដែរ ឬ ទេ? ដោយលោកនិយាយថាលោកមិនដឹងថាលោក Zelenskyy នឹងចូលរួមដែរឬមិនចូលរួមនោះទេ៕

សម្រួលអត្ថបទ៖ សុផារិន្ទ